Allaffimmi pisortaq

Marluinnik oqaaseqartuuit aqutsinermillu soqutigisaqarlutit, pitsaassutsimik qulakkeerinissamik HR-iuit? Taava illit pissarsiariniarpatsigit!

Allaffimmi pisortatut Peqqissutsimut Naalakkersuisoqarfiup Aqutsisoqarfiani pisortatut inissisimassaatit, Naalakkersuisumut allatsi kontorfuldmægtigilu suleqatigalugit Peqqissutsimut Naalakkersuisoq Naalakkersuisoqarfimmilu pisortaq sullisissallugit.

Akisussaaffiit atuuffiillu:

Allaffimmi pisortatut Aqutsisoqarfiup suliassai piukkunnaateqarfigalugit piginnaasaqarfigalugillu naammassineqarnissaasa qulakkeerneqarnissaat akisussaaffigissavatit. Ilanngullugu aqutsinermi suliassat isumagissavatit.

Suliassatit ilaatigut makkuupput:

• Aqutsisoqarfimmi ulluinnarni aqutsineq aammalu Aqutsisoqarfimmi sulisunut akisussaaneq.
• Aqutsisoqarfiup suliassaasa pilersaarusiorneri aqunneqarnerilu, matumani ilanngullugit allaffeqarfiup ingerlanneqarnera, paasissutissiineq nalunaarsuinerillu.
• Naalakkersuisoqarfiup aqutsisuinut allattaaneq, ilaatigut matumani ilanngullugit aqutsisoqatigiit ataatsimiinnissaannut ullormut oqaluuserisassaasa suliarineri imaqarniliornerilu.
• Naalakkersuisoqarfiup Sulisunik Ineriartortitsinerata isumaginissaa
• Naalakkersuisunut, Inatsisartunut, Inatsisartut Ataatsimiititaliaannut Inatsisartunut ilaasortanut Naalakkersuisunit allakkat pitsaassusaasa qulakkeerneqarnissaat.
• Kukkunersiuineq, annertunngitsumik nutserineq oqaluttaanerlu

Qaninnertut attaveqarfik:

Allaffimmi pisortaq Naalakkersuisoqarfiup pisortaanut qaninnertut saaffigisartagassaraa

Piukkunnaateqarneq piginnaaneqarnerlu

Atorfik makkuninnga piginnaaneqartumit inuttalerneqarnissaa kissaatigineqarpoq:

• Marluinnik oqaasilik, kalaallisut/danskisut
• Allallaqqissoq aamma oqallorissoq
• Namminersorsinnaasoq suliassanillu arlalinnik ataatsikkut suliaqarsinnaasoq
• Sapiissuseqartoq, pimoorussisinnaasoq suleqatiginnissinnaassuseqartoq
• Sullisserusussuseqartoq

Pisortat suliffeqarfiini imaluunniit Naalakkersuinermik suliaqarfiusunit aqunneqartuni misilittagaqarsimanissaq iluaqutaassaaq piumasaqaataananili.

Akissarsiat atorfinitsitaanermilu atugassarititat

Allaffimmi pisortatut atorfik Kalaallit Nunaanni akissaateqarfik 36-imi inissisimavoq, 49.340 kr.-inik immikkut tapisiaqartinneqarluni aammalu 45.280 kr.-inik immikkut tapisiaqartinneqarluni (tunngaviusumik tapit marluullutik 2006, 1. april-meersuupput).

Atorfinitsitsineq Namminersornerullutik Oqartussat kommunillu akornanni Kalaallit Nunaanni atorfillit pillugit isumaqatigiissutaat Inatsisartut inatsisaat nr. 21, 18. december 2003-meersoq naapertorlugu, atorfinitsitaanermut tunngasut Kalaallit Nunaanni Namminersornerullutik Oqartussat kommunillu atorfilinnut isumaqatigiissutaat malillugu pissaaq. Atorfik maannakkut nuummi inissisimavoq. atorfik isumaqatigiissuteqarnikkut aamma inuttalerneqarsinnaavoq.

Atorfimmut atatillugu inissaqartitsisoqarsinnaavoq, inigisamut, qularnaveeqqusiineq il.il. malittarisassat sukkulluunniit atuuttut naapertorlugit akiliuteqarfigineqartartussamik. Taamaattoq Nuummi inissaqarniarneq pissutigalugu inigilivigassamik tunineqarnissamut qaammatini pingasuniit aqqaneq marlunnut utaqqinissaq naatsorsuutigineqarsinnaavoq (inissiap angissusaa apeqqutaalluni). Initaavinnissavit tungaanut Naalakkersuisoqarfiup akiligaanik utaqqiisaasumik najugaqartinneqassaatit.

Kalaallit Nunaanni Naalakkersuisut pineqartullu kattuffiata isumaqatigiinniarsinnaatitaasup akornanni isumaqatigiissutit atuuttut naapertorlugit atorfininnermut soraarnermullu atatillugu angalanissamut pequtivillu nassiunneqarnissannut akiliunneqarnissannut pisinnaatitaaffeqarputit.