Ilinniarnertuunngorniarluni ilinniarnerit

Ilinniagassat piareersarfiusut ilinniaqqinnissamut tunngaviliisussat, atuagarsornikkut ingerlanneqartarput. Ilinniaqqinnissamut piareersarluni ilinniarneq ukiunik pingasunik sivisussuseqarpoq Kalaallit Nunaata iluani avataanilu ilinniaqqinnisamut ammaassisuulluni. Ilinniarnertuunngorniarneq (GU) Kalaallit Nunaanni ullumikkut malittarisassiuunneqarnikuuvoq Danmarkimi Undervisningsministeriaqarfimmiit. Taamani Namminersornerullutik Oqartussat 1. januar 2009-mi ilinniarnertuunngorniarneq (GU) Kalaallit Nunaanni qaffasinnerusumik niuernermik soraarummeernermik (HHX) aamma qaffasinnerusumik teknikkimi soraarummeernermik ilinniarnerit (HTX) pillugit oqartussaassuseq aqutsinerlu malittarisassatigut aalajangiisinnaassusilik tiguaat. KIIIN-ip maannakkut sulissutigivaa ilinniarnertuunngorniarluni ilinniarnernik nutarsaaneq. Nutarsaaneq piareersarneqarpoq naammassineqartussanngorlugu ukioq atuarfiusoq 2011/12 atuutilersussanngorlugu

GU (ilinniarnertuunngorniarneq) atituumik ilinniagaavoq, tassanilu fagit atuagarsorfiusut saniatigut fagit pilersitsiffiusut sammineqartarput, soorlu nipilersorneq, assilissanik eqqumiitsuliorneq timersornerlu. Pinngortitalerinermut tunngasut soorlu matematik, fysik, kemi aamma biologi sammineqartarput taamatullu oqaluttuarisaaneq, upperisalerineq inuiaqatigiilerinerlu. Tamakku saniatigut nammineq toqqagassanik pilersitsisoqarsinnaavoq soorlu qarasaasialerineq, film TV-lu, isumalioqqissaarneq (filosofi), psykologi, tysk aamma fransk.

Niuernermi Ilinniarfiup Qaqortumi neqeroorutigivaa HHX, tassani fagit pilersitsiffiusut aamma fysik kemilu faginik inuutissarsiutinut sammisunik taarserneqarnikuupput. HHX-imi tuluit oqaasii inuutissarsiutinut samminerusut ilinniassavatit, aamma inuutissarsiornermi aningaasaqarneq, tunisineq sullissinerlu, niuerneq, paasissutissiinermi teknologii, nunarsuaq tamakkerlugu aningaasaqarneq, ullutsinni oqaluttuarisaaneq, qarasaasialerineq aamma inuutissarsiornermi inatsisiliorneq neqeroorutaapput.

HTX, Sisimiuni Sanaartornermik Ilinniarfiup neqeroorutigivaa, faginullu teknikkimut pinngortitalerinermullu tunngasunut sammisuulluni; soorlu fysik, kemi aamma biologi pingaartinneqarput. Isummat tunngaviusut laboratoriani sulinikkut toqqaannartumik misilerarneqarsinnaapput. Ukioq kingulleq ukua arlaanni immikkut sammisassanik ilinniartut toqqaasarput: sanaartorneq, proces aamma nukissiorneq imaluunniit aatsitassat, pinngortitaq avatangiisillu.

Taakkua saniatigut ilinniagaq piareersarfiusoq ukiumik ataatsimik sivisussuseqartoq qinerneqarsinnaavoq, taannalu ilinniaqqiffinnut nunatsinniittunut immikkut toqqakkanut isissutaasinnaavoq. Pikkorissarneq taanna ukiumik ataatsimik sivisussuseqartoq neqeroorutaavoq Aasianni, Nuummi Qaqortumilu GU-ni. Uani atuaruk