Nunavut Summit Language-imut qaaqqusissut

Nunavumi naalakkersuisut Iqalunni oqaatsit pillugit ataatsimeersuartitsilerput februaarip qulingiluaaniit aqqaneq-aappaat 2010 ilanngullugu. Ataatsimeersuarnerup qulequtarivaa “Uqausivut atausiujjutivut (Oqaatsivut ataasiussutigaavut) - our language brings us together”. Taannalu Nunavut Summit Language-mik taaguuserneqarsimavoq.

Ataatsimerssuarnissamut qaaqqusisuuvoq oqaatsit pillugit naalakkersuisoq Louis Tapaardjuk.

Nunavumi naalakkersuisut kalaallit misilittagaat paasisaqarfigerusullugit naalakkersuisoq Mimi Karlsen, Oqaasileriffimmi, Inerisaavik/Ilinniusiorfimmilu sulisut aggersarpai, aammalu rappertartunik marlunnik kalaallisut oqaasilinnik qaaqqusillutik.

Ataatsimeersuarnermi qulaajarneqassapput Inuit, tuluit franskillu oqaasiini pissutsit.

Nunavumi oqaatsit pillugit inatsisaata nutaap atuutilernissaanut suut pingaarnerpaajussanersut aamma eqqartorneqassapput.

Oqaatsit pillugit ataatsimeersuarnermi Inuit nunaannit tamanit peqataasoqassaaq. Oqaatsitigut ikinnerussuteqartut nunallu inoqqaavisa oqaasiisa uummarsaqqinnissaat pillugit ilisimatuut soqutigisaqaqatigiillu peqatigiillutik periaatsit pitsaanerpaasussat nalilersoqatigiissavaat.

Pingaarnerpaatulli Nunavumiut oqaatsit pillugit pisinnaatitaaffitik qanoq innersut ilisimasaqarfiginerulissagaat oqaatsillu pillugit pilersaarusiornermi aqqutissiuinissamut uummaarissumik peqataanissamut periarfissaqassallutik.

Nunavumi pisortatigoortumik oqaatsit tamarmik illersorneqarlutillu siuarsarneqarnissaannut sulinermi kapitali nutaaq ammarneqartussanngorpoq ilanngullugu oqaatigineqarpoq.