Ilageeqarneq

Kalaallit Nunaanni Ilagiit Qallunaat Nunaanni ilagiinnut ilaasut, namminerisaminnik biskoppeqarfinngorlutik 1. november 1993-imi inissisimalerput. Ilageeqarneq pillugu inatsisartut peqqussutaat nr. 15, 28. oktober 1993-imeersoq malillugu ilageeqarnerup aaqqissuussaanera annertuumik allanngortiterneqarpoq. Upperisarsiornikkut siulersuineq biskoppimi inissisimanaannarpoq, oqaluffeqarnermilu allaffissornerup ingerlanneqarnera Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi ataatsimoortinneqarluni. 

Biskoppip suliassaraa, provstinik, palasinik ajoqinillu aamma ilagiinni kiffartornermik nalunaajaanermillu nakkutilliineq. Danskit ilagiivinut atalluni Kalaallit Nunaat namminerisaminik stiftiuvoq, biskoppilu naalagaaffimmit atorfinitsinneqarpoq.

Aaqqissuussaanikkut ilageeqarneq provsteqarfinnut pingasunut palaseqarfinnullu 17-inut avissimavoq:

• Kujataata provsteqarfia sisamanik palaseqarfeqartoq. Ilutigalugu marlunnik, kalaallinik Danmarkimi najugaqalersimasunik sullissisussanik, palaseqarpoq Kujataata Provsteqarfiata ataani isumagineqartunik. 
• Qeqqata, Avanersuup Tunullu provsteqarfia arfinilinnik palaseqarfeqartoq kiisalu 
• Avannaata provsteqarfia arfineq marlunnik palaseqarfeqartoq.

Provsteqarfinni pingasuusuni tamani provsteqarfimmut allaffeqarpoq, qitiusumik ilageeqarnermi allaffeqarfimmik isumaginnittussanik. Provsteqarfimmi ataatsimiititaliat, tassaasut provsteqarfiup palaseqarfiisa sinniisuutitaattut innuttaasunit qinikkat, provsti ulluinnarni aqutsisutut ilaasortaralugu, aningaasaliissutinik akisussaasuupput. Biskoppeqarfik provsteqarfiilu tamarmik Inatsisartut aningaasanut inatsisaanni kontomi pingaarnermi ilaapput. 

Naalagiarfiusarfinni ikinnerpaamik 30-nik innuttaqartuni tamani oqaluffeqartuni / oqaluffeqartuni atuarfiuutigisunik ilagiinni sinniisoq ataaseq qinerneqassaaq. Ilagiit sinniisaasa qitiusumik suliassaraat ilagiit ilageeqarnermi suliani eqeersimaartumik peqataanerannik siuarsaanissaq. 

2002-imi palasit 25-it atorfinitsinneqarput. Palasit ulluinnarni sulinerminni ajoqinik ilinniarsimasunit ilinniarsimanngitsunillu ikiorteqartarput. 2002-imi ajoqit ilinniarsimasut 45-iupput ajoqillu ilinniarsimanngitsut 35-iullutik.