Imaani isumannaallisaanermut siunnersuutit

Isumannaallisaanermut siunnersuutit qulit:

Umiatsiaq motoorilu aserfallatsaaliukkit:

Umiatsiaq motoorilu paarilluarneqarpata aserortoornissap ulorianaateqarnera annikinnerussaaq. Aserfallatsaaliuinissamut peqqussutit, umiatsiap ilitsersuutaani allassimasut malikkukkit, assersuutigalugu motoorimik aserortoornissap ulorianaateqarnera annikillisissinnaavat.

Angallatit motoorillu aserfallatsaaliornissaannut peqqussutit assigiinngitsuummata, umiatsiap ilitsersuutaa innersuussutigineqartariaqarpoq.

Isumannaallisaanermi atortunik nassarit:

Takuuk: Imaani isumannaallisaanermi atortut

Nalunnissamik ilinniarit:

Nalunnissamik ilinniaruit isumatusaarnerussaaq. Umiatsiamit nakkaruit nammineerlutit umiatsiamut utersinnaanissat pingaaruteqarpoq, pingaartumik kisimiillutit angalanermi.

Aallartinnak silassaq misissoqqaaruk:

Angalassaguit silassaq angalanissat tamakkerlugu atuuttussaq misissoqqaaruk. Sila tassanngaannaq allanngorsinnaavoq. Aallaravit silagimmat silagiinnarnissaa qulakkeersinnaanngilat.

Sumunnarnerlutit tamatigut ilisimatitsissutigisaruk:

Sumunnarnerlutit aammalu qanoq sivisutigisumik peqannginnissat naatsorsuutiginerlugu allanut ilisimatitsisarnissat pingaaruteqarpoq. Piffissap ingerlanerani pilersaarutitit allanngussappata, tamanna aamma ilisimatitsissutigissavat, taamaalillutit pisariaqanngitsumik tammaaneqartutit nalunaarutigineqassangimmat.

Oqorsaatissaqarnissat eqqaamasaruk:

Imaaniilluni sila nillersinnaavoq, aamma aallaravit taamatut misigisimanngikkaluarlutit. Kiisalu sila silallu kiassusaa ississusialu allanngupallassinnaapput. Taamaattumik oqorsaatinik nassataqarnissat, taamaalillutillu oqorsarsinnaanissat tamatigut eqqaamasaruk.

Angalanissamik ilinniarit:

Umiatsiap iluani isumannaassutsimut umiatsiap aquttuata umiatsiap passunnissaanik aammalu imarsiornermi maleruagassanik ilisimaarinninnissaa pisariaqarpoq. Tamanna ilaatigut aqussinnaanermut uppernarsaammik angusaqarniarluni soraarummeernikkut, imaluunniit umiatsiamik aqunnermik sammisaqalinnginnermi angalasartumik misilittagalimmik angalaqateqartarnikkut anguneqarsinnaavoq.

Umiatsiami aalaatillutit mianersortarit:

Umiatsiami orluneq annertuunik kingunerluuteqarsinnaavoq. Immamut nakkartoqarsinnaavoq, immaqalu nakkarnermi ilisimajunnaartoqarsinnaalluni.

Umiatsiaq kinnguppat qimaqinagu:

Taamaalillutit naniuminarnerussaatit. Nunamut qaqinissamut periarfissaqaruit taamaaliussaatit. Taamaattorli umiatsiamut qanittumiikkuit iluaqutaasussaavoq, taamaalillutit silaannarmiit takujuminarnerussagavit.

Imigassartorsimatillutit angalanngisaannarit:

Imigassartoruit tamanna makittarissutsinnut, qisuariarnissannut sivisussusermut naliliisinnaaninnullu sunniuteqartussaavoq. Tamakku tamarmik umiatsiami isumannaassutsimut ulorianaateqarsinnaapput. Aalakoorluni angalaneq nammineq allallu isumannaassusaannut eqquinerlussinnaavoq.

Download "Isumannaallisaanermut siunnersuutit 10" (164 KB)