Nunatsinni silap pissusaa, nunatta anginerujussua killeqartumillu inoqarnera pissutigalugit timmisartortitsisarfimmik ingerlatsinissaq ajornakusoortorujussuuvoq. Ingerlatsinissamut atukkat immikkoorluinnartut imaannaanngitsullu pissutigalugit immikkoortut ilaanni Air Greenlandip silaannakkut angallassisartunut allanut assersuunneqarnissaa ajornakusoorpoq. Tamatumunnga ilanngukkaanni Nunatsinni silaannakkut angallassisarnermi ingerlaffinni ikitsuinnarni unammillertoqarsinnaaneranut tunngaveqarnera, oqaatigineqareersullu ataqatigiissikkaanni taava ingerlatseqatigiiffiup naammassisaqarsinnaassusiatigut qulaajaanissamut pitsanngorsaanissamullu periutsinik nutaanik Air Greenlandip misissuiuarnissaa alajangiisuulluinnartuuvoq, tamatumani ilanngullugu periarfissaatillugu silaannakkut angallassisartunik allanik assersuussisarluni.
Air Greenlandi ingerlaarfigisami ilaanni unammillerteqalertussanngorpoq, tassami ingerlatsisartoq alla nunatta iluani timmisartumik ingerlaarfinnik Kangerlussuarmiit Ilulissanut, Kangerlussuaq ¿ Nuummut pilersitsinissaminik, aamma sapaatip akunneranut ataasiarluni Reykjavikimut atassuteqartarnissamut ilaatigut nalunaaruteqarnikuummat. Taamatut ineriartorneq tunngaviatigut ajunngitsuuvoq, tassami unammillernerup annertusineratigut akit appartinneqarsinnaallutillu angallassinermi ilaasut amerlanerulersinnaammata.
Ingerlatsisuniit allaniit annertunerusumik unammillertoqarneranut Air Greenlandip illuatungiliussinera aningaasartuutit appartinneqarnerinik aamma piginnaasanik atuinerup pitsaanerulersinneranik kiisalu ilaasut avataaneersut amerlanerulersinniarnerannik tunngaveqartariaqarpoq. Tamakku tamarmik inuussutissarsiutitigut ineriartornerup uummaarinnerulerneranut ilapittutaasinnaapput, tamakkulumi aamma Air Greenlandimut iluaqutaasussaallutik.
Ingerlassivik unnuisarfimmik ingerlatsinermigut aamma angalatitsivimmik ilaatigut ingerlataqarnermigut takornariaqarnermut attuumassuteqartunik ingerlataqarmat pingaaruteqartuuvoq allat avataaniitsinniarlugit timmisartuussisarnermi anginerpaalluni inissisimanermik atornerluisutut pissutissaqartumik pisuutinneqarsinnaasutut inissisimalinnginnissaq qulakkiissallugu. Tamanna minnerunngitsumik maannakkut Air Greenlandip immikkoortuni arlalinni pingaaruteqartuni sakkortuumik inissisimaneranut aamma kiffartuussinissamut isu-maqatigiissummiit annertuumik akiliutiniit suliffeqarfik ajutuuinnissamut annertuumik isumannaallisaataasut isigingaanni. Taamaattumik akit immikkut appasissut atorlugit imaluunniit angalatitseqatigiinnit allanit inniminniinissamut pitsaanerusumik periarfissaqarnikkut timmisartuutit atorlugit nammineq takornariartitanik naammaginanngitsumik salliutitsisoqartariaqanngilaq.
Angallannikkut aaqqissuussinerup nutaap atulersinneqarnerata kingorna Air Greenlandi suli annerusumik ilaasunik angallassinerup iluani oqartussaanerpaalluni inissisimalersimavoq. Taamaalilluni suli pingaarnerulerpoq Air Greenlandip ilisimaarissagaa ingerlatsivik inuiaqatigiinnut tunngatillugu akissussaaffeqarnera akikilliliisarnerillu aqqutigalugit innuttaasut tamaasa angalanissaannut periarfissaqarnissaannut peqataanissaa. Naalakkersuisut neriuutigaat aamma siunissami nuna tamakkerlugu peqataaffigineqartumik kulturikkut timersornikullu aaqqissuussinissanut aningaasaqarnikkut periarfissaajumaartoq.
Timmisartumik angallassinerup iluani suliassat pissusissamisoortumik ilaanngitsunik allanut suliassanngortinnissaannut periarfissat Air Greenlandimit isumaliutigineqarnissaat Naalakkersuisut pissusissamisoortutut isigivaat. Tassunga atatillugu Naalakkersuisut pissusissamisoortuutippaat Air Greenlandi nunatsinni pisiortorfiit unammillersinnaalluartut akornanni pisiortortussarsiussappat.
Taamatuttaaq naalakkersuisut kajumissaarutigerusuppaat, Air Greenlandip niuernermi atukkat tunngavigalugit, ingerlaarfinnik nutaanik pilersitsinissamut periarfissanik misissuissappat, ajornanngippat peqatigisinnaasat suleqatigalugit. Tassani pingaartumik eqqarsaatigineqarput amerikamut avannarlermut aamma Islandimut imarpik qulaallugit ingerlaarfiit. Ingerlaarfiit taakku nunatsinni inuussutissarsiortut ineriartornissaannut periarfissanut ilaassapput innuttaasunillu pitsaasumik sullissinerussalluni. Tamatuma ilutigisaanik imarpiit qulaallugit ingerlaarfiit nutaat nunatsinni takornariaqartitsinermut niuerfinnik nutaanik ammaassissapput.
Nunatsinni takornariaqartitsinerup ineriartortinnerani Air Greenlandi aalajangiisuulluni peqataasutut Naalakkersuisunit isigineqarpoq. Naalakkersuisut naatsorsuutigivaat peqataasunik allanik naleqquttunik suleqateqarluni inuussutissarsiutip iluani ineriartornermi inerisaanermilu, ilinniartitsinermi nittarsaassinermilu ingerlatsiviup peqataanissaa. Aammattaaq Air Greenlandi atlantikukkut ingerlaarfimmi nunattalu iluani angallassinermi pingaarnertut ingerlatsisuusutut oqimaaqatigiissitsinermi immikkut ajornakusoorluinnartumik akisussaasuuvoq. Ilaatigut ukiup ilaani ulapileruttulerfimmi inissat piumasaqarnerillu imminnut naapertuunnissaat kissaatigineqartarpoq, taamaalilluni tamanna takornariaqartitsinikkut ineriartortitsinermut siuarsaaqataasinnaalluni, ilaatillugu aamma kissaatigineqartarluni ukiup ilaani ulapiffiunngitsumi sinneqartumik inissaqartoqannginniissaa, taamaalilluni nunatsinni innuttaasut ukiup ilaani ulapileruttulerfimmi akinik qaffasinnerusunik inissamik pisariqartitsineruffiusumik akiliisinneqarneroqqunagit.
Unammilligassasi ukiuni tulliuttuni aamma imaannaanngillat ¿ taamaammat sulilluarnissassinnik kissaappassi. Neriuppunga pisortaasup naalakkersuisut qujaniarnerat suleqataasunut tamanut apuukkumaarai.
Qujanaq.