Angallassinermi ataqatigiissaarineq

Angallassinerup ataqatigiisaarneqarnera nukittunerulersinneqarpoq

Sisamanngornermi marsip 7-ani 2002-mi Naalakkersuisunut ilaasortap Jørgen Wæver Johansenip nunatsinni ingerlatseqatigiiffiit ilaasunik timmisartuussisartut imaatigullu angallassisartut sulianut tunngasut pillugit katersuuteqatigai. Angallassinerummi iluani pisinnaasaqassutsip atorluarnissaa qulakkeerneqassappat pisariaqartinneqarpoq oqaloqatigiinnissaq ataatsimullu sammiveqarluni suleqatigiinnissaq, atuisut sullinneqarnerisa pitsaanerpaap anguneqarnera peqatigalugu.

Grønlandsfly, Air Alpha, SAS, Arctic Umiaq Line, Greenland Tourism A/S aamma Mittarfeqarfiit ullormi katersuuteqatigiinnermi peqataapput.

Angallanneq pillugu katersuuteqatigiinneq pilersinneqarpoq angalaassinerup iluani soqutigisat assigiinngitsut amerlasuut iluaqusersoqatigiissikkumallugit. Ullumikkummi aalajangersimasumik ingerlaarfeqarluni angallassiffinnik nalinginnaasumik niuerneq tunngavigalugu iluanaaruteqarfiusunik aamma aalajangersimasunik ingerlaarfeqarluni angallassiffinnik pisortanit suliariumannittussarsiuunneqartartunik angallanneq pillugu aaqqissuussisoqarnikuuvoq. Taamaattumik amerlasuunik assigiinngitsunillu annertuunik imminnut ataatsimut kattussanik isummerfigisariaqakkanik ajornartorsiuteqarpoq. Ingerlatseqatigiiffiit namminersortut pisariinnerpaamik ingerlanneqartariaqarput, pisortaniillu tapiissutit aningaasaliissutitut killiliussat iluaniittariaqarlutik. Pisinnaasaqassuseq atorluarneqartariaqarpoq, ilaasullu angalanerminni sapinngisamik sivikinnerpaamik utaqqitinneqartarlutik. Tamaattoqassappat oqaloqatigiinneq ataatsimullu sammiveqarluni suleqatigiinneq pisariaqarpoq.

Angallanneq pillugu katersuuteqatigiinnermi angallassinermik suliaqartut Naalakkersuisunut ilaasortamit kajumissaarneqarput pilersaarutiminnik paarlaaseqatigeeqqullugit, tamatuma kingorna immikkut tamarmik - taamatut suliaqartut allat suleqatigalugit - atuisartunut angalanermi periarfissat pitsaanerpaat pilersinneqarnissaat siunertaralugu.

Ineqarnermut, Attaveqarnermut Pilersuinermullu Naalakkersuisoq Jørgen Wæver Johansen oqarpoq:

"Angallanneq pillugu katersuuteqatigiinnermi angallassinermik suliaqartut ataatsimoorlutik oqaloqatigiinnissaannut katsersuuteqatigiinneq aqqutigalugu Naalakkersuisunit periarfissinneqarput, atuisartut innuttaasullu pitsaanerpaamik angallannikkut sullinneqarnissamik perusutaasa naammassineqarnissaat pillugit. Peqataasunit oqaatigineqarpoq taamatut iliorneq iluatsilluartoq. Angallassinissamik pilersaarutinik paarlaaseqatigiittoqarpoq misigisartakkallu ajornartorsiutillu arlaqartut oqaloqatigiissutigineqarlutik. Peqataasut isumaqatigiissuteqarput, ataatsimut siunnerfeqartumik suleqatigiinnissamik aammalu isumaqatigiissusiortoqartarnissaanik periarfissiisumik. Ajornartorsiutit tamarluinnaasa aaqqiiffiginngilagut, kisiannili oqaloqatigiinnerit aallartinneqarput. Taamaattumik qularnaasavara siunissami aamma anngallanneq pillugu katersuuteqatigiittoqartarnissaanut taamaattumut qaaqqusisoqartarnissaa."

Annertunerusumik paasisaqarusuttut pisortaq Jens K. Lyberth, Ineqarnermut, Attaveqarnermut Pilersuinermullu Pisortaqarfimmut saaffigisinnaavaat, oqarasuaat: 34 54 04, fax: 34 54 10 imaluunniit e-mail: jly@gh.gl