Angallannermut naalakkersuisut

Angallanneq pillugu ataatsimeeqatigiinneq

Københavnimi februaarip 14-ani naapinnerup nangeqqinneratut Danskit Angallannermut Naalakkersuisuat  Flemming Hansen, Nunatsinnilu Ineqarnermut Attaveqarnermut Pilersuinermullu Naalakkersuisoq Jørgen Wæver Johansen, Ilulissani aggustip 4-maani ataatsimeeqatigiipput.

Ataatsimeeqatigiinneq siusinnerusutuut suliaqarfiullunilu pitsaasumik ingerlanneqarpoq.

Jørgen Wæver Johansenip Flemming Hansenillu eqqaasitseqatigiissutigaat ukiunut tulliuttunut qaninnernut Nunatta Danmarkillu akornanni timmisartuussisaarnissap qulakkeerneqarsinnaasunngornera. Ukiup tulliani apriilimiit SAS-p Nunatsinnut timmisartuussisarnini unitsinniarlugu nalunaarutigisimavaa. Tamatuma kingunerisaanik Air Greenlandip kissaatigilersimavaa timmisartumik maannakkumiit annerusumik atuutsilersitsinissaq, Naalakkersuisullu ingerlatseqatigiiffiup Atlanikoq qulaallugu timmisartuussinissamut akuersissutaataanik sivitsuinissaq inassutigisimavaat, 2003-mi apriilimiit 2007-mi oktobarimut, tamannalu Danskit Angallannermut Naalakkersuisuanit ilalerneqarpoq. Kisermaassisuunissaq uani pineqanngilaq.

Nunatsinnik timmisartuussinermi ungasinnerusoq eqqarsaatigalugu eqqaasitseqatigiissutigaat ukioq februaarimi ataatsimiinnermut atatillugu suleqatigiissitat pilersissimasamik suliaq ingerlataat. Suleqatigiissitap suliassaraa misissussallugu nalilersussallugulu siunissami Nunatsinni timmisartuussinermi suut aalajangersakkat malittarineqassanersut. Isumaqatigiissutaavoq periarfissat assigiinngitsut nalilersorneqarnissaat, toqqaannartumik Nunatta timmisartuussivigineqarnerani Islandikkullu timmisartuussivigineqarsinnaanerani. Suleqatigiissitaq nalunaarusiamik 2003-p aasaanerani tunniussisussaavoq, Nunattalu angallannikkut sullinneqarneranut atatillugu oqallinnermi ilanngunneqarsinnaanngussalluni.
Atlantikoq qulaallugu billetsit akiisa akuersissutigineqartarnerinut tunngatillugu pisariillisaanissaq Jørgen Wæver Johansenip Flemming Hansenillu isumaqatigiissutigaat. Aappaagu apriilimiit ingerlatseqatigiiffiit billetsinut akisunernut akigitinniagaat kisimik pisortanik akuersissutigineqaqqaartalissapput. Siunissamilu imaalertussaassalluni ingerlatseqatigiiffiit namminneq akikinnernik tuniniaanerni akigititassaminnik aalajangersaasinnaanngorlutik. Tamatuma kingunersaanik ingerlatseqatigiiffiit eqaannerusumik periaaseqalersinnaassapput imminnut angalasunullu iluaqutaasussamik, pisortallu allaffissornikkut oqilisaanneqassallutik.
Silaannakkut angallannermi pitsanngorsaanissaq tunaartaralugu Flemming Hansenip Jørgen Wæver Johansenillu isumaqatigiissutigaattaaq, immikkut malittarisassat, suleqatigiissitap kalaallit danskillu pisortaasa pilersissimasaata 2001-mi saqqummiussaminni innersuussutaat ingerlateqqinneqassasut. Saqqummiussami tikkuarneqarpoq mittarfinnut pisariillisakkanut periarfissat, ilaatigut qatserinermut annaassiniarnermullu, timmisartut ingerlaarnerini nakkutilliinernut mitsitsinernilu atortorissaarutinut immikkut malittarisassaqartitsinikkut atortunut ingerlatsinermullu aningaasartuutinik ikiliserujussuartitsisinnaaneq.
Kiisalu DMI-p Nunatsinni suliaasa annertussusaat eqqartorneqarpoq.

Paasissutissanik annertunerusunik perusuttut, Trafikministeriet, 2. kontor, tlf.: +45 33923355-mut, imaluunniit Namminersornerullutik Oqartussat, IAPP tlf.: + 299 345000-mut saaffiginninnikkut ikiorneqarsinnaapput.