Nutaatut illuni quleriinnik inissiartalinni 1. april 2005-ip kingorna allakkanik nakkartitsisarfeqarfinnik ataatsimoortunik ikkusisoqartalissaaq.
Allakkanik nakkartitsisarfinnik ikkussuinissamut maleruagassat nutaat ”POST Greenlandip ingerlatsinera, allakkanik ingerlatitseqqittarnera, allakkanik ammaasarnera aamma allakkanut nakkartitsisarfinnik pilersuinera pillugu Namminersornerullutik Oqartussat nalunaarutaanni”, 1. april 2005-imi atuutilersussami aalajangersarneqarput. Maleruagassat taamaallaat illoqarfinnut, POST Greenlandip allakkanik agguaaffigisartagaanut atuutsinneqarput. Taamaalilluni maleruagassat nunaqarfinnut, allakkanik agguaaffiusanngitsunut atuutsinneqanngillat.
Nalunaarummi allassimavoq:
- Illut quleriinnik inissiartallit, 1. april 2005-ip kingorna sananissamut akuersissuteqartoqarneratigut sananeqartut allakkanik nakkartitsisarfilersorneqassapput.
- Inoqutigiit allat tamarmik 31. december 2005 nallertinnagu matuni allakkanik nakkartitsivissanik imaluunniit allakkanik nakkartitsarfinnik pilerneqarsimassapput.
Allakkanik nakkartitsisarfeqarfik ataatsimoorussamik atugassiaavoq, inoqutigiinnut tamavinnut allakkanik nakkartitsisarfeqartoq. Siunissami illut quleriinnik inissiartallit nutaamik sananeqartut ataatsimoortunik allakkanik nakkartitsisarfeqarfilerneqartalissapput, ininut allernut inissinneqartussanik.
Allakkanik nakkartitsisarfinnik imaluunniit allakkanik nakkartitsisarfeqarfinnik ikkussuinissaq illumik piginnittup akisussaaffigissavaa aningaasartuutigissallugulu. Maleruagassat malinneqanngippata POST Greenland allakkanik agguaassinngitsoorsinnaavoq, tigusisussallu allagarsiassaminik aallernissaq nammineq isumagissallugu.
Innarluutillit angallarluttullu, assersuutigalugu allagarsiassaminnik inini allerni allakkanik nakkartitsisarfeqarfimmut nammineerlutik aallersinnaanngitsut immikkut akuersisoqartoqarneratigut allagarsiassatik angerlarsimaffimminnut aatissinnaavaat.
Annertunerusumik paasisaqarusukkuit uunga saaffiginnissinnaavutit souschef Kasper Juul-Nielsen, Ineqarnermut Attaveqarnermullu Pisortaqarfik, oqarasuaat 34 54 45.