Qaammatit 15-it ulapputtoqareersoq Aasiaat aalisariutinut 94 meterit missaannik takissusilimmik talittarfittaarput. Talittarfittaaq Namminersornerullutik Oqartussani Ineqarnermut, Attaveqarnermut Pilersuinermullu Pisortaqarfimmit akilerneqarpoq. Namminersortut suliffiutaannit Phil & Søn Grønland ApS-imit sananeqarpoq suliat naammassineqarneranni ingeniørit suliffiutaat Carl Bro nakkutilliisuulluni.
Siunertaavoq aalisariutinut talittarfeqalernikkut umiarsuarnut imarpikkoortaatinut talittarfik inissa-qarnerulissasoq taamaalilluni imarpikkut containerersorlunilu angallassineq ajornartorsiutitaqannginnerusumik ingerlasinnaalissammat. Talittarfittaarnikkut siunertat tamakku naammassineqarnissaat qulakkeerniarlugu Ineqarnermut, Attaveqarnermut Pilersuinermullu Pisortaqarfiup Aasiaat Kommuniat, Royal Arctic Line, Carl Bro aamma umiarsualivimmik atuisut talittarfittaassap ilusilersorneqarnerani suleqatigai.
”Assut nuannaarutigaara Ineqarnermut, Attaveqarnermut Pilersuinermullu Naalakkersuisoqarfiup qaammatip ataatsip ingerlanerinnaani Upernavimmi Aasiannilu talittarfittaat naammassisinnaammagit. Tamanna talittarfeqarnermut tunngassuteqartuni pissanganartumik ineriartortoqarneranut takussutissaavoq. Neriuppunga Aasianni aalisariutinut talittarfittaaq kommunimi innuttaasunut minnerunngitsumillu imaatigut inuussutissarsiortunut annertuumik iluaqutaassasoq,” Ineqarnermut, Attaveqarnermut Pilersuinermullu Naalakkersuisoq Jørgen Wæver Johansen oqarpoq.
Aalisariutit talittarfittaavat sinerissamut tukingasumik sammiveqarpoq Qeqertannguup kujammut kangimut nuuanut sammilluni. Quassuttoorsuarnik nappartitikkanik sanaajuvoq nunamullu ikaartarfinnguamik 10 meterinik takissusilimmik atassusigaalluni.
Aalisariutinut talittarfiup sanaartorneqarneranut atatillugu aammattaaq umiatsiaaqqanut mikinerusumik talittarfittaartoqarpoq. Taamaaliortoqarpoq Sissakkooriaq atuarlugu kalaalimineerniarfiup talittarfiullu akornanni ujaqqanik qarmat annertusinerisigut, ujaqqat quassuttuunik nakkaanaveeqquserlugit.
Erseqqinnerusunnik paasisaqarusuttunut paasiniaavissaq: Fuldmægtig Per Corell, oqarasuaat 34 54 56.