Tusagassiorfiit aqqutigalugit Nuummi Ilulissanilu borgmesterit peqatigiillutik allakkanik ammasuni allagaqarput, kommunini marlunni pineqartuni timmisartunut mittarfiit tallineqarnissaat massakkut aallartinneqartariaqartut. Naalakkersuisut isumaqatigaat, mittarfiit pineqartuni takinerussasut, kisiannili qularnaarneqassasoq siunissaq ungasissoq isigalugu aamma tamakkiisumik isiginnilluta aaqqiissuteqartoqarnissaa aalajangiinermi tunngavigineqassasut.
Naalakkersuisuni isertoratik oqaatigaat Nuummi Ilulissanilu mittarfiit takinerussasut. Sumi inissineqassanersut qanorlu takitigissanersut misissoqqaarneqassaaq. Inuiaqatigiit akissaqanngillat tuaviupilulluni aalajangiisoqarnissaanut.
Mittarfiit pineqartut marluk takinerunissaat angallannermik aaqqissuussinerup iluseqartinneqarnerata sinneranut annertuunik kinguneqartussaavoq, minnerunngitsumik Kangerlussuup siunissaanut. Taamaattumik Naalakkersuisut isumaat naapertorlugu qulakkeerneqartariaqarpoq, aaqqiissutissat siunissamut qularnaarneqarnissaat, aamma Nuummi mittarfik takinerusoq tassaasariaqartoq Kangerlussuarmi mittarfimmut piviusumik taartaasinnaasoq.
Nuummi mittarfiup ukiut 25-inngorlugit malunnartitsilluni nalliuttorsiutiginerani oqalugiarninni oqaatigivara, Nuummi mittarfiup qanoq pineqarnera arlalippassuartigut qitiulluni aalajangiisuusussaasoq, nunatsinni illoqarfiit pingaarnersaannuinnaanngitsoq aammali Kalaallit Nunaata sinneranut siunissami angallannerup ineriartortinneqarnissaani periarfissanut aamma killilersuutaasussanut. Taamaattumik mittarfiit takinerunissaat kommuninut tunngasuinnaanngillat, nunali tamakkerlugu naalakkersuinikkut ingerlatsinermut aamma tunngassuteqarluinnarlutik.
Siunissami qaninnermi Nuup aamma Ilulissat kommuniisaa akulikinnerusumik oqaloqatigisarnissaat pilersaarutigaara. Pingaaruteqarpoq peqatigiilluta tamakkiisumik isiginnilluta aammalu inuiaqatigiinnut ajunngitsumik aaqqiissuteqarnissarput – aaqqiissuteqarneq kommuninut pineqartunut marlunnut iluaqutaasoq, kisiannili aamma nunatta sinneranut iluaqutaasoq.
Jens Napãtôk’
Annertunerusumik paasisaqarusukkuit uunga saaffiginnissinnaavutit Naalakkersuisoq Jens Napãtôk’ oqarasuaat 34 54 01.