Tamatuma peqatigisaanik siunnersuuteqartut paasisinnaannginnerarpaat Namminersornerullutik Oqartussaniit erngerlutik sullissinissamik isumaqatigiissusiornissamut taamaalillunilu angallannermi pissutsit pitsanngortinneqarnissaannut piumasusseqartoqanngimmat.
"Naalakkersuisut sumiiffinni assigiinngitsuni angallannermut pissutsit eqqumaffigisorujussuuaat aammalu innuttaasut angallannikkut pitsaasunik sapinngisamik atugassaqartinnissaasa qulakkeerneqarnissaa sulissutigiuarlugu. Tamatuma peqatigisaanik angallannermi pissutsit allanngorartuarput, allaat allannguutimininnguit qaqugumorsuarmut kinguneqartitseriataarsinnaasarlutik - ilaanneeriarlunilu ajorluinnartunik kinguneqartarlutik. Taamaattumik neqeroorutitsialannik taasanik saqqummiussisoqartillugu uippallersimaarnaveersaarnissaq pisariaqarpoq. Neqeroorutit taamaattut kikkunnut pitsaasuunersut paasiniassallugu tamatigut pingaaruteqartarpoq. Atuisunut imaluunniit angallatseqatigiiffimmut aalajangersimaqqinnaartumut pitsaasuuppat?
- Angallannermi allannguutissatut siunnersuutit piffissami kingullermi uannut nassiunneqartartut nalilersuiffiginiarlugit Naalakkersuisoqarfinni ulapputtoqartorujussuunera erseqqissaassutigissallugu pingaartittorujussuuara.
Suliniutit nutaat nunami maani innuttaasunut piffissamut qanittumut ungasissumullu iluaqutaanissaat qulakkeerniarlugu nalilersuilluaqqissaarnissaq pisariaqarpoq. Pipallatamik aaqqiinerit innuttaasunut ataasiakkaanut inuiaqatigiinnullu tamarmiusunut akisoorujussuanngorsinnaapput, Angallannermut Naalakkersuisunut Kim Kielsen oqarpoq.
Ilaasunik angallassinerup ukioq manna ukiuniluunniit tulliuttuni annertusinissaanut Aningaasanut inatsimmi aningaasanik immikkoortitsisoqarnikuunngilaq. Angallannermi suliniutissat nutaat aallartinneqannginnerini piffissap suliaqarfissatut pisariaqartinneqartup ataqqineqarnissaa pingaaruteqarpoq. Siullerpaamik neqeroorutit assigiinngitsut sukumiisumik nalilersuiffigineqassapput. Taamatut nalilersuinerit Inatsisartut Aningaasaqarnermut Ataatsimiititaliaanut inassuteqartoqassappat tunngavigineqarsinnaassaapput. Aatsaat tamatuma kingorna Naalakkersuisut suliassaqarfimmi pineqartumi suliniutinik nutaanik aallartitsisinnaapput.
Ineqarnermut, Attaveqarnermut Aatsitassanullu Naalakkersuisup Kim Kielsen-ip neqeroorutinik assigiinngitsunik sukumiisumik nalilersuinerup qanittukkut piareernissaa naatsorsuutigaa.
Annertunerusumik paasisaqarusukkuit uunga saaffiginnissinnaavutit:, Ineqarnermut Attaveqarnermullu Pisortaqarfik, immikkoortortami pisortaq Michael Pedersen oqarasuaat 34 54 41.