Asasakka ataatsimeersuarnermi peqataasut,
Nunatsinni illoqarfiit nunaqarfiillu akornanni aqqusinersuaqanngilaq.
Nunanut kimmut kangimullu sanilerisatsinnut aqqusinersuit, ikaartarfiit qimuttuitsullu aqqutaat piunngillat. Kisianni periarfissaqarpugut pilertortumik killeqanngiusattumillu pisinnaasalimmik nunarput nunarsuup sinneranut atassusissallugu. Isumasioqatigiinnermi matumani "Kalaallit Nunaat internettimi"-mik taaguusersimasatsinni peqataanissassinnut tikilluaritsi!
Paasissutisseeqatigiittarnermut attaveqarnermullu nunatsinni atortorissaarutit ullumikkornit atorluarnerusinnaanerat pillugu isumasioqatigiinnissaq aallarnersinnaagakku nuannaarutigaara.
Attaveqatigiinnermut atortorissaarutip pioreersup - ulluinnarni radiokæde-mik taaneqartartup - ullumikkornit piginnaasaqarnerulersinneratigut taassumalu saniatigut immap naqqatigoortumik kabel-imik pilersitsoqarsimaleriarpat nunatsinni periarfissaalerumaartussat pinngitsooratik atorluarneqartariaqarput.
Periarfissat assigiinngitsorpassuusinnaasut pillugit isumasioqatigiinnerup matuma ingerlanerani tusartinneqarnissarput ¿ siunissamilu periarfissaalersussanik ilisimasaqarnerulersinneqarnissarput naatsorsuutigaara. Taamatuttaaq naatsorsuutigaara periarfissaalerumaartussat atorluassagutsigit qanoq iliortariaqarnitsinnik paasisimaqarnerulernissatsinnut isumasioqatigiinneq manna tunngavissiissasoq. Ukiuni tulliuttuni anguniagassatsinnut siunnerfiusinnaasunik ¿ isumassarsianillu nutaanik ¿ saqqummiisoqassaaq.
Imaannanngitsunik takorluugaqassaagut. Eqqarsartaasitoqarput atorlugu immitsinnut siumoortumik aporfissalersussanngilagut. Aporfissaasinnaasut pinnagit periarfissaasinnasut pingaarnerutillugit isiginiassavagut ¿ sungiusimasatoqqat killissaritittagaat qaangerniarlugit sapiisersinnaassuseqartariaqalerpugut.
Ullut tamaasa takujuarpagut attaveqatigiinnermi atortorissaarutit iluaqutigalugit sumiiffinni ungasingaartuni ikkaluartut uaneralannguaq ittutut allaat isikkoqartinneqartalersut. Inuit akunnerminni - assersuutigalugu suleqatigiinniarunik - nunarsuatta ilaanni sumiinnerat apeqqutaavallaarunnaariartorpoq.
Isumaqarpunga ineriartornerup tassunga killissimanera qujarutissallugu uagut maani nunatsinni pissutissaqarnerpaajusugut.
Nunatsinni isorartoqisumi angalanermut aningaasarpassuit atortarpagut, uffa massa aningaasat allatut iluaqutiginiarneqarsinnaagaluartut. Attaveqatigiinnikkut atortorissaarutit atorneqarnerat ilinniartitsinermut, nakorsiartitsisarnermut attaveqatigiinnerullu tungaatigut allatut annertusarneqaraluarpat inuunerput arlalitsigut pitsaanerulersissallugu periarfissaqaraluarpugut. Aammali tamakku saniatigut attaveqatigiinnikkut atortorissaarutit ullumikkornit annertunerusumik atulernerisigut naammassisaqarsinnaassuserput annertusarsinnaassagaluarparput. Tassa nunatsinni suut tamarmik imminnut ungasinnerujussuisa killiliisuullutillu aporfiusarnerat annikinnerulersissinnaagaluarparput.
Attaveqatigiinnerup tungaatigut atortorissaarutivut ukiuni kingullerni arlalissuanngortuni piorsartuarsimavagut, kisiannili tamanna tunngavigalugu imminut naammagisimaaginnalernissatsinnut pissutissaqanngivippugut. Ineriartornerup ingerlanerani siuarsimanerpaanut akuunissarput anguniartuartariaqarparput. Taamaattumik piorsaanitsinni alloriarfissatta tullia tassaavoq nunatsinniit kabelimik immap naqqatigoortumik nunanut allanut siaarsinissarput.
Kabel-imik taamaattumik pilersitsineq nunatta aningaasaqassusia eqqarsaatigalugu akisoorujussuuvoq. Kisianni isumaqarpunga aningaasartuutissat kisiisa matumani isiginiarsinnaanngikkivut.
Isumaqarpunga nunatta nunanit allanit avinngarusimalluni inissisimanera eqqarsaatigalugu kabel-imik pisaarnissaq isumatusaarnerussasoq. Taamatut aningaasaliinitsigut aningaasaqarnikkut nammineersinnaasuseqarnerput piorsassallugu periarfissarissaarnerulissaagut, ilisimasanik avitseqateqarnissatsinnut periarfissat pitsaanerulersissavagut, sulilu aamma kinguaariit tulliit ilinniartitaanikkut periarfissarissaarnerulersissavagut. Tamakku tamarmik tamatta ullumikkornit pituttorsimannginnerulluta siunissami kiffaanngissuseqarnerulluta inuulernissatsinnut tunngavissiissapput. Taammammanuna kabel-imik pilersitsinissap ingerlatsinermut aningaasartuutitassai kisimiitsillugit isiginiartariaqanngikkivut.
Immap naqqatigoortumik kabel-imik pilersitsineq inuiaqatigiinni ineriartortitsinermut pingaaruteqarluinnartussaavoq. Uanga isiginnittaasera naapertorlugu kabeli pilersinneqaruni tassaalerumaarpoq aleq nunatta nunarsuup sinneranut attaveqarnerani katinngatitsisussaq. Aamma nunatta avataaniipput ilisimasassarpassuusinnaasut periarfissarpassuillu sungiusimasatsinnit allaanerusut amerlasoorpassuit. Ilisimasat nunatta avataaniittut periarfissarpassuillu sungiutinnarsimasatta killiliineratigut takorloorsinnaarpianngisagulluunniit uatsinnut qaninnerulersinniarlugit iliuuseqarniarnitsinni immitsinnut erliguuttariaqanngilagut. Akerliannili aamma paasissutisseeqatigiittarnerup tungaatigut piorsaanissami pingaaruteqarluinnarpoq paasissutissat ingerlaartarnerisa ataasiinnarmik sammiveqalernissaasa pinngitsoorsimatinniarnissaa. Pingaaruteqarluinnartormi alla tassaavoq nunatta avataanit ilisimaneqarnerulernissaata aqqutissiuunniarneqarnissaa. Nunatsinni isumassarsiat nunatta avataani isummersortartunut sunniuteqarsinnaasut, nunatsinnilu kulturimut tunngasut, nunatsinniit avammut nassiussuussinnaanissaat ullumikkornit pitsaanerusumik periarfissaqarfigilertariaqarparput.
Taamaalilluni kabel-ip immap naqqatigoortup periarfissatsialannik assigiinngitsunik marlunnik peqalersissavaatsigut.
Siulleq tassaassaaq ilisimasat periarfissarpassuillu nunatta avataani ittut qaninnilerulersissallugit. Nunarpummi tassaaginnarpoq nunarsuup angisoorujussuup ilamernga - nunattalu avataaniipput ilisimasat periarfissarparujussuillu.
Periarfissaalersussap aappaa tassaassaaq nunarput qimallugu angalagaangatta nunarsuaq inuuneqarfiusoq qimallugulusooq misigisariaarunnissarput. Attaveqaatit ineriartornermut malinnaatinneqarluarsimasut iluaqutigalugit toortakkat toortaannarlugit nutaarsiassat -paasissutissallu allat nunatsinneersut ¿ ullumikkornit ajornannginnerusumik pissarsiarisinnaalissavagut.
Tusagassiuteqarnikkut atortorissaarutit eqqarsaatigalugit naqitanngorlugit saqqummersitakkat kisiisa periarfissatuaasutut isigiinnalissanngilagut. Naqitanngorlugit saqqummiunneqartartut saniatigut aamma assinik uummassusilinnik ¿ tassa TV atorlugu aallakaatitseriaatsimik suliat ¿ nipillu ¿ nunatsinniit avammut paasissutissiisarnermik suliaqartunut akisoorsuunngikkaluartumik nassiussorsinnaanissaat teknikikkut periarfissaqartariaqarpoq.
Taamaalilluni kabeli immap naqqatigoortoq tassaalerumaarpoq ilisimasanik isummanillu avitseqatigiittarnermut aqqutaalersussaq, niueqateqarnissamullu tunngavissiijumaartussaq.
Tamanna nunatsinniit nunarsuup sinneranut attaveqarnermi ¿ nunattalu nunarsuarmioqatigiit akornanni killilimmik ilisimaneqarnerata iliuuseqarfiginiarnerani ¿ pingaaruteqarluinnartussaq.
Nunarsuup sinneranit immikkut avinngarusimalluinnartunngorluta immitsinnut aaqqissuussivigissanngilagut. Paasissutissiisarnikkut, tusagassiuteqarnikkut attaveqatigiinnikkullu atortorissaarutit ineriartornerat nunat killeqarfiinik ersigunnaarsitsiartuinnavippoq. Tamanna pitsaaqquteqarlunilu ilungersornartortaqarsinnaavoq. Ineriartornerup nassatarisaanik pissutsit allangorartuarnerisa unammillernarsinnaasortai sillimaffigalugit nakkutigisariaqarpagut.
Attaveqatigiinnikkut atortorissaarutinik piorsaanissatta tiguartiffigivallaannginnerani immitsinnut eqqaasittariaqarpugut atortorissaarutinik piorsaaneq immini naammanngimmat. Atortorissaarutit aatsaat siunertaq malillugu iluaqutigineqalissapput qanoq atorluarneqarsinnaaneri paasisimalerutsigit. Uanga isiginnittaasera naapertorlugu attaveqatigiinnikkut atortorissaarutit tassaaginnarput sakkut iluaqutiginiarneqarsinnaasut. Atortorissaarutit taakku qanoq iluaqutigineqarsinnaaneri inuiaqatigiit ullumikkornit annerusumik ilisimalertariaqarpaat. Tamavitta assigiissutigaarput sakkut suulluunniit qanoq atorneqarnissaat inunngornitsinni ilisimaneq ajoratsigit. Atuinissamik imminut sungiusarnitsinni misilittagarilikkavut tunngavigalugit sakkut qanoq atorutsigit iluaqutigisinnaanerlutigit paasiartulersavarparput. Taamaattumik aamma matumani ilinniartitaaneq pingaaruteqarluinnarpoq.
Ineriartorneq kaassalisutut pissuseqarluni sukkaqisumik ingerlajuarpoq, ineriartornermullu malinnaaniartutut pissusilersunngikkutta avatitsinniittut uagut utaqqiniarluta arriillinissaat naatsorsuutigissanngilarput.
Immitsinnut piginnaanngorsartuarnitsigut unammillersinnaassuseqarnerput attattuarniartariaqarparput. Taamaaliussaagut ilinniartitaaneq ilinniarsimasanullu piginnaasaqarnerulernissaq siunertaralugu pikkorissartuartarnerit atorlugit. Inuiaqatigiit imminnut taama aaqqissuussiviginissaat orniginarluinnartuuvoq.
Nunarsuarmioqatigiit oqaluttuarisaanerat qiviaraanni ukiuni amalersoorpassuanngortuni kiffartuussinikkut sullissisinnaassuseqarneq, ilisimasaqassuseq nioqqutaasinnaasunillu tunisassiorsinnaaneq ineriartornermut tunngaviulluinnarsimapput. Nioqqutissiornikkut periaasittoqqat kisiisa tunngavigalugit imminut napatinniarneq ukiuni makkunani ilungersunarsiartuinnavippoq. Inuiaqatigiillu sumiikkaluartulluunniit periaasitoqqat kisiisa tunngavigalugit ingerlaniartut katataajartuinnavittussaapput. Immap naqqatigoortumik kabel-imik peqalernitsigut siunissami nunatsinni ineriartorneq tunngavississavarput.
Nunarsuarmi nunat ingerlalluarnerpaat tassaapput nunarsuarmioqatigiit akunnerminni susassareqatigiikkiartuinnarnerannut - malunnaatilimmik pilertortumillu - nalimmassarnissaminnut piginnaassuseqarnerminnik atuisut. Naalakkersuisut anguniagaraat nunarput nunanut taamaattunut akuussasoq. Taamaattumik ilinniartitaaneq iliuuseqarfigiuartariaqarparput. Taamaammallu immikkut nuannaarutigilluinnarpara takusinnaagakku inuusuttunik arlalinnik isumasioqatigiinnermi matumani peqataasoqartoq. Taakkununnga ima oqarussuppunga: Ilissi tassaavusi nunatsinni ineriartornermik kivitsisussat. Tamanna akisussaafferujussuuvoq, taamaakkaluartoq qularutiginngilara akisussaaffimmik taassuminnga naammassinnissallusi pisinnaalluartusi.
Inuiaqatigiit ineriartortuartut ilisarnaatigisarpaat kinguaariit nutaat siuliminnit ilinniarluarsimanerusarnerat. Sammivik taanna attassinnaagutsigu ajunngitsup tungaanut ingerlaarsimassaagut.
Isumasioqatigiinnerup matuma inernerisa takusinnaanngornissaat qilanaaraara. Matuma kingorna tamatta killingusaat alisinnerusut isigisinnaalersimassagivut neriuutigalugu matumani peqataalluarnissassinnik kissaappassi.
Qujanaq!