Eqqaaniut: Niels Kreutzmann maqaasineqassaaq

Aliasuutigeqisannik Niels Kreutzmann-ip, Mittarfeqarfinni pisortaasup, arfininngormat januaarip ulluisa 21-anni tassanngaannartumik toqukkut qimagunnera pillugu nalunaarut tiguara.

Angallannermut Naalakkersuisutut Mittarfeqarfinni allanngortiterinissamut politikkikkut nalerassanik saqqummiussisimavunga. Siunnersuutinik saqqummiussisinnaaniassagatta Nielsip sulisuni anguniagaqarluarluni suleqatigai. Toqunngitsiarnermini suliap killiffia uannut saqqummiuppaa. Suliaq kusanarluinnarpoq, taannalu suliaralugu nanginneqassaaq.

Niels ajoraluartumik taamaallaat ukiut marluk sinnilaarlugit Mittarfeqarfinni pisortaagaluarluni, ukiut marluk taakku ingerlanerini annertuumik sunniuteqarpoq – tassalu angut taanna siuttoralugu Mittarfeqarfiit sullissivittut suliffeqarfinngorsimavoq nutaaliaasoq.

Allannguinernik taakkuninnga naammassinnissinnaasimaneranut siullertut pingaarnertullu inuppalaassusia pissutaasimavoq.

Niels inuuvoq sorusunnerminik ilisimaarinnittoq, kisiannili taamaakkaluartoq aamma inuuvoq inoqatiminut soqutiginnittoq – tusaaniartartorlu. Aamma inuit allat torersumik pinissaat tamatigut pingaartittarpaa.

Taamaattumik uagut Naalakkersuisuni taamatullu Mittarfeqarfinni sulisut annertuumik tatigisarisimavarput.

Tassalu toqukkut qimagunnera Mittarfeqarfinnuinnaq annaasaqarfiunngilaq, aammali inuiaqatigiinnut kalaallinut tamanut annaasaqarfiuvoq.

Annaasaqarnermili tassani ilaquttat annaasaqarnerat nallerneqarsinnaanngilaq. Taamaattumik ulluni makkunani ilaqutaasut eqqaamavavut qamanngalu pisumik misiginneqatigalugit.

Nielsip eqqaaneqarnera ataqqinartitaali.