Mittarfeqarfinni pisortaagallartussaq

Mittarfeqarfiit pisortaata Niels Kreutzmann-ip tassanngaannartumik toqukkut qimagunnerata kingorna Namminersorlutik Oqartussat Niels Grosen Mittarfeqarfinni pisortaagallartussatut toqqarpaat. Piffissami nutaamik pisortamik atorfinitsitsinissap tungaanut suliffeqarfik aqussavaa. Niels Grosen Mittarfeqarfinni ukiut 25-it sinnerlugit atorfinni assigiinngitsuni sulisimavoq, aammalu ukioq kingulleq novembarimi ingerlatsinermut pisortatut toqqarneqarluni, mittarfiit qulimiguulinnullu mittarfiit tamaasa akisussaaffigalugit.

Ineqarnermut, Attaveqarnermut Angallannermullu Naalakkersuisoqarfimmi pisortaq Steffen Ulrich-Lynge oqarpoq:

”Mittarfeqarfiit ineriartupiluuleruttornerup nalaaniippoq, taannalu Niels Kreutzmann-ip annertunerpaamik siuttuuffigisimavaa. Sulinerup taassuma anersaaq taanna tunngavigalugu aammalu kigaallanngilluinnarluni ingerlaqqinnissaa qulakkeerniarparput:

Piffissami qanittumi pisortaagallartussap aammalu pisortaqatigiit sinnerisa sulisullu tamatuma pinissaa isumagissavaat. Ineriartornerup ukiuni marlunni kingullerni Niels Kreutzmann-ip pisortaaffigisaata nalaani pilersup kingorna Mittarfeqarfinni aaqqissuussaaneq patajaatsuuvoq.

– Nalunngilara Niels Kreutzmann-ip toqukkut qimagunnera annertoorsuarmik annaasaqarfiugaluartoq, sulisut tunniusimalluinnarnerisa kingunerisaanik ineriartorneq pitsaasoq kigaallannertaqanngitsumik ingerlaqqissasoq”, Steffen Ulrich-Lynge naggasiivoq.

Atorfinitsitsinermut ataatsimiititaliaq nutaamik pisortassarsiussaaq

Suliassaq tullinnguuttoq tassaavoq siunissami Mittarfeqarfinni siuttuusussamik nutaamik pisortassarsiornissaq. Pingaaruteqarpoq inummik naleqquttumik pissarsinissaq, taamaattumik Namminersorlutik Oqartussat atorfinitsitsinissamut ataatsimiititaliamik pilersitsipput, Naalakkersuisoqarfimmiit aamma Mittarfeqarfinniit inuttaqartinneqartumik. Atorfinitsitsinermut ataatsimiititaliap maannakkkut aalajangersassavaa atorfinitsitsinerup ingerlanera qanoq ingerlassanersoq, kisiannili maannangaaq paasinarsereerpoq atorfimmut qinnuteqartussat pitsaanerpaajunissaat qulakkeerniarlugu avataaneersumik piginnaaneqartumik atuisoqassasoq.