Naalakkersuisoq Jens B Frederiksen: Maleruagassat piumasaannarmik nassuiarniagassaanngillat

Narsaq Qaqortorlu isumaqatigiissitsiniarluni suliami akiliissasut Naalakkersuisut – taamatulluunniit Nukissiorfiit – aalajangertussaanngilaat. Nukissiornermi akit qanoq ilillutik aalajangersarneqartassanersut Inatsisartut assigiimmik akeqarunnaartitsinermut aningaasanullu inatsimmut akuersinermikkut aalajangigaraat. Naalakkersuisut akinik akuersinermikkut maleruagassat suleriaatsillu suliassaqarfimmi atuutsinneqartut malippaat.

Atuisut akiliutaasa najukkami pilersuinermut aningaasartuutinut naapertuunnissaat assigiimmik akeqarunnaarsitsinermi siunertaavoq. Suliffeqarfinni pilersuisuusuni najukkami aningaasartuutit amerlanersaat tassaasarput innaallagissiorfinnik, imiliorfinnik, siaruarterissutsinik allanillu, Kalaallit Nunaanni nukissiornermi pilersuinermik aallaaveqartunik sanaartornermut aningaasartuutit. Taamaattumik sanaartornermi suliat naatsorsuutigisamit akisunerulernerini imaluunniit entreprenørinut aaqqiagiinngissuteqarnermi aningaasartuutit qaffaataat aamma najukkanit ataasiakkaanit akilerneqartarput.

Politikkikkut aningaasartuutit agguarneqartarnerat annertunerusumik annikinnerusumilluunniit isumaqatiginngissinnaavagut. Aningaasartuutit tamarmik imaluunniit taakku ilaannaat Narsami Qaqortumilu atuisunit nammanneqassappat? Akit qaffannerisa sakkortuumik eqquinerat ersarippoq.

Kisiannili aamma nukissiornermik atuisut tamarmik imaluunniit akileraartartut aningaasartuutit ilassutissaannut taakkununnga akiliinissaat annertunerusumik annikinnerusumilluunniit isumaqatiginnginneqarsinnaavoq.

Tamatumunngali peqatigitillugu aamma erseqqissassallugu pingaaruteqarpoq, Narsami Qaqortumilu atuisut kisimiillutik aningaasartuutinik tamakkiisunik nammattussaanngimmata. Innaallagissamut akit annerpaaffeqarput, atuisut qaffasippallaanik akiliinissaannut illersuutaasunik. Akit annerpaaffissaat atuisunit allanit, soorlu Sisimiuni Nuummilu innaallagissamik atuisunit aamma Aningaasanut Inatsit aqqutigalugu akileraartartunit agguaaqqinnikkut aningaasalersorneqartarput.

Erseqqissaatigerusuppara, najugaqarfinni amerlanerussuteqartunut innaallagissamut akit 1.1.2012 aallarnerfigalugu apparmata. Innaallagissamut akit annerpaaffissaat kWh-mut 3,48 koruuniniit 3,33 koruuninut apparpoq.