Canadamut angallavik: Kalaallit Nunaannut tamarmiusumut nutaarsiassaq nuannersoq

Nuup Iqaluillu akornanni angallavimmik toqqaannartumik ammaaniarluni Air Greenlandip aalajangernera Ineqarnermut, Attaveqarnermut Angallannermullu Naalakkersuisup Jens B. Frederiksen-ip iluarisimaarpaa.

2011-p ingerlanerani Jens B. Frederiksen angallavimmik ammaaniarluni piareersarnermut suleqataavoq. Tassalu Kalaallit Nunaata Amerikamut niuernermik tunngaveqartumik niuerpalaartumik attavilerneqarnissaa piffissami sivisuumi neriuutigisimavaa:

”Aallaqqaammut angallaviup pingaartumik aatsitassarsiornermut suliassaqarfimmi iluaqutaanissaa naatsorsuutigaara. Kalaallit Nunaanni uuliap aatsitassallu saffiugassat pillugit soqutiginninnerup annertunerulernerani Canadamut Canadamiillu assartuussinerup pitsaasup pisariaqartinneqarnera annertusisimavoq. Tamatuma saniatigut angallavik Amerikap avannarliup nunavittaata sinneranut attaveqarnissamut pitsaalluinnartunik, tamatsinnut iluaqutaasinnaasunik periarfissiivoq”, Jens B. Frederiksen erseqqissaavoq.

Aatsitassarsiornermut suliassaqarfimmi pisariaqartitsinerup naammassineqarnerata saniatigut, angallavik aamma takornariaqarnermik annertusitseqataassasoq, nunallu marluusut akornanni kulturikkut ataqatigiinnermik nukittunerulersitsissasoq Ineqarnermut, Attaveqarnermut Angallannermullu Naalakkersuisup neriuutigaa.

2012-imi juunip ulluisa 29-anniit septembarip ulluisa pingajuannut Dash 8 atorlugu sapaatit akunnerannut marloriarluni timmisartuussisarnissaq pilersaarutigineqartoq Air Greenlandimit ilisimatitsissutigineqarpoq. Air Greenlandimit ilisimatitsissutigineqartut malillugit Iqalunniit Amerikap avannaata kangiani illoqarfinnut annernut ingerlaqqinnissamut aqqutit pitsaasuussapput. Angallavik niuernerinnarmik tunngaveqarluni pilersinneqassaaq.

Nuup Iqaluillu akornanni angallaviup aallarnisarneqarnissaa pillugu suliaqarnissamut tunngasunik paasisaqarusunnermi Air Greenlandimut innersuussisoqarpoq.