Naalakkersuisut ilumoorlutik oqalupput

”Kim Kielsen ungasissumut eqqaamasinnaanngilaq”, Naalakkersuisunut ilaasortaq Jens B. Frederiksen nangillunilu: ”Ineqarnermut Naalakkersuisuusimasoq Kim Kielsen, Siumut, 2008-mi politikkikkut pisortami Hans Enoksenip peqqusineratigut najugaqarfinni isertitat aningaasartuutillu oqimaaqatigiinnissaannik tunngaveqarneq uniorlugu iliuuseqarpoq, taamaalillunilu 2009-mi ineqarnermut akiliutit 2008-mut naleqqiullutik qaffatsinneqannginnissaannik Naalakkersuisut aalajangermata inatsit atorunnaarsinneqarluni. Aningaasaliinissamut inatsisitigut tunngaviusut oqaasertaliussineq tunngavigalugu aalajangersarneqarput, tassanilu allassimavoq, Namminersornerullutik Oqartussat inissiaataanni attartortittakkani attartortut pilersaarutaasumik piffissamullu aalajangikkamik aserfallatsaaliuinermut, katillugit 14,2 mio. koruuninik naleqartumut akiliisinneqarnissaat kinguartinneqassasoq, aningaasallu taakku suli amigaatigaavut”.

Siumumiit Kim Kielsenip suleqataasalu aningaasaqarnikkut tukattuliarisimasaat maanna naalakkersuisuusunit kingornunneqarsimapput. Najugaqarfinni mikisuni aningaasaqarnikkut ulorianartorsiornerit aaqqiiffiginiarlugit Namminersorlutik Oqartussat inissiaataat attartortittakkat tamarmik – immikkoortortat mikisunnguit atorunnaarlugit – nuna tamakkerlugu najugaqarfimmut, naatsorsuuserinikkut arlalinnik immikkoortortaqartumut ataatsimut katersuunneqarput, tamannalu aamma 2010-mut 2011-mullu aningaasanut inatsisini takuneqarsinnaavoq.

Tassunga oqaaseqaatitut imatut allassimasoqarpoq: Namminersorlutik Oqartussat inissiarsuaataasa tamarmik nuna tamakkerlugu najugaqarfimmut ataatsimoortinneqarsinnaalersinniarlugit piginnaatitsissut ivertinneqarpoq. […..] Taamaalilluni maannamut periaasiusimasoq, ineqarnermut akiliutinik aalajangiisarnermi najugaqarfinni minnerni, tamarmik immikkut namminneerlutik aningaasaqartuni inissiaatit agguarneqarnerannik tunngaveqarsimasoq qimanneqarpoq.”

1987-imili Kalaallit Nunaata ineqarneq tigummagu– Siumup aqutsinerata nalaani - ineqarnermut akiliutit appasitsinneqartut iliuuseqarfiginissaannut maannamut politikkikkut pisariaqartinneqartumik qunusuissuseqartoqarsimannginnera malunniussimavoq. Taamanili aserfallatsaaliuinissamut akiliuteqartitsinissaq aamma aningaasat amerlanerusut immikkoortinneqartariaqarnerat takuneqarsimasariaqaraluarpoq. Tamanna pisimasuuppat ullumikkut pissutsit atorsimassanngikkaluarpagut. Taamatut akisussaassuseqannginneq ingerlatiinnassagutsigu, meerartavut iluarsaassinikkut qaangeruminaatsunik maannatut imaluunniit ajornerusunik atugaqartilertussaavagut.

Naalakkersuisunut ilaasortaq Jens B. Frederiksen naggasiutigalugu oqarpoq: ”Appisaluussinermut akisussaaffeqannginnermillu oqalunnermut taarsiullugu inissiat aserfallatsaalineqarnerinut akisussaaqataaneq nassuerutigisinnaasuugunikku, aammalu pilersitsiviusinnaasunik siunnersuuteqarsinnaagunik nalinginnaasumik Kim Kielsenimut pingaartumillu Siumumut tulluassagaluarpoq.”