Inissiat aatsaat taama amerlatigisut 2011-mi atorneqalersut

Taakku imatut agguarneqarput:

• Ilinniartunut inissiat ataatsimik, marlunnik pingasunillu initallit 94-it
• Inissiat attartortittakkat nalinginnaasut, ataatsimik affarmillu, marlunnik, pingasunik sisamanillu initallit 74-t
• Inissiat nammineerluni pigisat, ataatsimik affarmillu, marlunnik, pingasunik sisamanillu initallit 44-t
• Sulisunut inissiat ataatsimik affarmillu, marlunnik, pingasunik, sisamanik tallimanillu initallit 91-it

Naalakkersuisunut ilaasortaq Jens B. Frederiksen oqarpoq: ”Inissaaleqinerup akiorniarneqarnera aallartivippoq. Sanaartorneq 2012-imi ingerlaqqissaaq, januaarip qiteqqunnerani illoqarfinni illut, Ilulissani, Sisimiuni aamma Qaqortumi sananeqartussat suliariumannittussarsiuunneqassallutik. Taakku saniatigut Aasianni Nanortalimmilu ilaqutariinnut illut sananeqassapput, taamatullu ilaqutariinnut illut, Tasiilami sanallugit aallarteriikkatta saniatigut arfineq pingasut neqerooruteqartitsivigissallugit.”

Tassani inissiat attartortittakkat nalinginnaasut, Illuut A/S-ip ataani sananeqartussat, kikkulluunniit qinnuteqaateqarfigisinnaasaat pineqartut, Naalakkersuisunit erseqqissarneqarpoq. Ineqarnermut akiliutit Namminersorlutik Oqartussat inissiaataanni allani pisoqaasunilu akiliutinit qaffasinnerulaarput, kisiannili inissiamut aningaasartuutit ataatsimut isigalugit qaffasinneruallaanngillat, imermut kiassarnermullu aningaasartuutit inissiani nutaani avatangiisinullu ajoqutaanngitsuni appasinnerungaatsiartussaammata.

Tamatuma saniatigut akiliutit, siunissami aserfallatsaaliuinermut immikkoortinneqartussat inissiani nutaani ineqarnermut akiliutinut ilaatinneqarput. Taamaalilluta meerartatta ukiut 20-t qaangiuppata maanna iluarsaassinissamut kinguaattooruterpassuatsinnik kingornussinissaat pinngitsoortissavarput.

”Matumani illoqarfinni nutarterinissaq pisariaqartinneqartorujussuaq, ineqarnermut suliniutinut maanna suliaralugit atuutsilerniarlugillu ingerlatama ilagisaat matumani pineqarmat erseqqissaatigissallugu uannut pingaaruteqarpoq. Taamaalilluni Qaqortumi, Maniitsumi, Aasianni Tasiilamilu iluarsaassilluni misiligutitut suliassat 2012-imi aallartinneqariissapput.”, Naalakkersuisunut ilaasortaq Jens B. Frederiksen oqarpoq, nangillunilu: ”Blok P-p isaterneqarnissaa sinerissami inissiarsuit qaqortut altaniusanik isaariallit isaterlugit nutaalianik peqqinnartunillu inissialiortiternissamut ilinniarfiunissaa naatsorsuutigaara.”