Nunaqarfinni isorliunerusunilu sanaartugassanut aningaasaliisoqarpoq

Aningaasaqarnermut Ataatsimiititaliap 29. april 2010-mi ataatsimiinnermini, nuna-qarfinni isorliunerusunilu suliassat arlallit aallartinneqarnissaannut aningaasanik atugassanngortitsinissamik Naalakkersuisut kissaateqarnerat akueraa.

Pingaartumik Qaanaami Kullorsuarmilu inissaaleqinerup annertunera tunngavigalugu, Qaanaami kommunip illuliassai katillugit aqqaneq marluk, mandetiiminut tapiissutitaqartinneqartussat Qaasuitsup Kommunianut neqeroorutigineqassasut akuerineqarpoq. Illuliassat taakkua agguataarneranni sisamat Qaanaamut aamma arfineq pingasut Kullorsuarmut agguataarneqassapput. Taakkununnga aningaasaliissutissat 11 million ko-ruuniussapput.

- 2010-mi toqqavissai illutassaalu nassiunneqassapput, kiisalu atortulersuutissat illutaatalu iluaniittussat il.il. 2011-mi nassiunneqassallutik. Taamaalilluni atortussat ukiuunerani uninngatinneqarnerminni ajoqusinnginnissaat, aammalu atorfissaqartinneqalerunik aatsaat nassiunneqarnissaat qulakkeerneqassaaq, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.

Kiisalu 29 million koruunit Upernavik Kujallermi, Iginniarfimmi aamma Nuussuarmi atuarfinnik iluarsaassinissamut alliliinissamullu atugassanngortinneqarput. Nunaqarfinni atuarfiit arlaat aallartinneqarnissaminnut salliutinneqassanersut pillugu apeqqut, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisup taassumalu allaffeqarfiata tulleriiaarinerisigut inissinneqarpoq. Aningaasanut inatsisissamut ukiumoortumik siunnersuutit suliarineqartarnerinut atatillugu atuarfinni pissutsit pillugit paasisat nutaanerpaat tunngavigalugit immikkoortumut pilersaarummik iluarsiisoqartarpoq; tamannalu kingullermik 2010-mut aningaasanut inatsisissatut siunnersuutip suliarineqarneranut atatillugu pivoq.

- Suliassat 2009-mi naliliiffigeqqinneqartut ilaat aallarteqqissinnaaleratsigit nuannaarutigaarput, Ineqarnermut, Attaveqarnermut Angallannermullu Naalakkersuisoq Jens B. Frederiksen naggasiivoq.

A/S Inissiaatileqatigiiffik INI Namminersorlutik Oqartussat sinnerlugit sanatitsisutut suliassanik taakkuninnga isumaginnittussaavoq.