Betoninik pcb-mik akulinnik DIH-p eqqaani inissialiortiternermi atueqqittoqanngilaq

Blok Q-p isaterneqarnerani betonit PCB-mik akullit piiarneqartut tamarmik Danmarkimi Kommunekemi-mut nassiunneqarput, tassanilu navianaataarullugit aserorterneqarlutik. Beton-it aserorterneqartut 649 tonsit pineqarput, Namminersorlutillu Oqartussat inissiinermut, nassiussinermut tamatumalu kingorna aserorterititsinermut aningaasartuutaat 3.238.436 koruuniupput.

Blok Q-p isaterneqarnerani atortut betoniusut, PCB-nik akulinnik qalipanneqarsimasut immikkoortiterneqarput. Tassani atortut piiarneqartut tassapput qajannaallisaatit, altaniusat pladetaat iigaasartaallu. Betoninik atortut taakku imikkut piiarneqarput, Kommunekemi-mullu aserorterneqartussanngorlugit nassiunneqarlutik.

Sanaartukkanit eqqagassat allat, Blok Q-p isaterneqannginneraneersut, taamaalillunilu PCB-p ajornartorsiutaanerata ilisimaneqalinnginneraneersut Qeqertakasinnut inissinneqartut qanoq iliorneqassanersut Nunami Namminermi, Avatangiisinut Pinngortitamullu Naalakkersuisoqarfimmit naliliiffigineqassaaq.

Taamaattumik Sermitsiaq/AG-p internettikkut aviisiatigut allagaq ”Blok Q Sana-p eqqaanut iginneqarsimagunarpoq”, 10. Marts 2010-meersoq kukkusumik paasititsivoq. Qulequttamut oqaasertaliussaq naatsoq imatut nipeqarpoq; ”Anniarsiorfimmi aprilip 9-ani makku assilisaapput. Takuneqarsinnaavoq blok Q-ip igitassartai Sanap eqqaani inissianut napasulianut toqqammavissatut atorneqarlutik iginneqartut.”

Oqaasertaa naatsoq allaaserisamut ”Eqqagassat toqunartullit sissiukkakkut iginneqartut” link-imik innersuussutitaqarpoq.

Taamaattumik taanna isumaqalersitsivoq, betoni DIH-p eqqaani inissialiortiternermut atoqqineqartoq, aammalu Blok Q-meersoq toqunartoqarsimassasoq. Taamatut isummerneq allaaserisami oqaaseqaatigineqartunit uppernarsarneqarpoq.

- Namminersorlutik Oqartussat atortunik PCB-nik akulinnik illersorneqarsinnaanngitsumik iliuuseqarsimasutut, aammalu sanaartukkanik allanik sanaartornermut atatillugu sanaartukkanit eqqagassanik PCB-nik akulinnik atueqqissimasutut Sermitsiaq/AG-p Qanoruullu isumaqalersitsinerat inissaminiinngilaq. Taamatummi pisoqanngilluinnarpoq, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.