Assartuussineq pillugu Isumalioqatigiissitaq Kalaallit Nunaat tamaat isigalugu sulivoq

Assartuussineq pillugu Isumalioqatigiissitap isumaliutissiissusiaminik aasamut tunniussinissani suli naatsorsuutigaa. Piffissaliussaq taanna Naalakkersuisunut pingaaruteqartorujussuuvoq, Assartuussineq pillugu Isumalioqatigiissitammi piffissap naammaginartup iluani innersuussutiminik tunniussinissaa politikikkut suliassat aallartinneqarasuarnissaannut pingaaruteqarpoq.

Assartuussineq pillugu Isumalioqatigiissitaq siunissami Kalaallit Nunaat tamakkerlugu angallasseriaasissamik misissuilluni ingerlallualeruttorpoq. Assartuussineq pillugu Isumalioqatigiissitaq inuiaqatigiit kalaallit akornanni inissisimavoq, aamma nunap immikkoortuini eqqarsaatigisassat Isumalioqatigiissitap suliaanut ilaatinneqarput.

Borgmesterit pingasuusut Assartuussineq pillugu Isumalioqatigiissitamik, arlalitsigut ammasumik oqaloqatigiinnissamut kaammattuisuusumut, isornartorsiuinerannut Naalakkersuisut isumaqataanngillat. Kommunit tamarmik ataatsimiitsitaliaaqqanut, Assartuussineq pillugu Isumalioqatigiissitap sulineranut atatillugu ingerlaavartumik tusarniaaffigineqartartussanut ilaanissaannut qaaqquneqarsimapput. Taamatuttaaq kommunit tamarmik martsip qaammataata naalernerani Kangerlussuarmi oqaloqatigiiffiusumik ataatsimiinnissamut qaaqquneqareerput.

Kiisalu erseqqissaatigineqassaaq, Assartuussineq pillugu Isumalioqatigiissitami ilaasortat ilaat ataaseq KANUKOKA-mit toqqaannartumik toqqarneqarsimammat.

Assartuussineq pillugu Isumalioqatigiissitap katitigaanera eqqarsaatigalugu ilisimatitsissutigineqarsinnaavoq, ilaasortat sulianut ilisimasaqarnertik toqqammavigalugu toqqarneqarsimammata, taamaalillunilu Assartuussineq pillugu Isumalioqatigiissitaq tamarmiusoq Isumalioqatigiissitap sulineranut atatillugu piginnaaneqarfinnik assigiinngitsorpassuarnut tunngasunik piginnaaneqarnissaa qulakkeerneqarpoq.

Tamanna tunngavigalugu Assartuussineq pillugu Isumalioqatigiissitami ilaasortat siunissami Kalaallit Nunaanni angallannerup ilusissaanik siunnersuusiornermi suliassanik naammassinnissinnaassasut, Naalakkersuisunit qularineqanngilaq.

Naalakkersuisut inassuteqaatinik tigusaqarnissartik qilanaaraat, tamatumalu kingorna politikikkut aalajangigassat aalajangerneqartussanngorpata, kommunit pitsaasumik pilersitsiviusumillu suleqatigineqarnissaat qilanaaralugu.