Blok P-miut inissiassaat Qinngorpumi

Tassani illut immikkoortut arfinillit, suliffeqarfimmit Permagreen-imit sananeqartut pineqarput. Illut tamarmik immikkut 14-inik inissiartaqarput, agguataarlutik marlunnik initallit arfinillit 62 kvadratmeterit missaannik angissuseqarlutik aamma pingasunik initallit arfineq pingasut 78 kvadratmeterit missaannik angissuseqartut.

Inissiat Qinngorpumi, Nuup immikkoortuaniittumi Pisissiani sananeqassapput. Inissiat affaat 2011-mi iserterfigineqarsinnaassapput, sinnerilu 2012-imi iserterfigineqarsinnaassallutik. Sanaartukkat iserterfigeriaannaallutik kvadratmeterimut 19.545 koruuninik akeqassapput, inissiallu naammassineqarneranni tiguneqarnerannut atatillugu aatsaat akilerneqassapput.

“Blok P-mi maannakkut attartorlutik ineqartut inissianut nutaanut salliusussaatitaassapput. Inissiat inissiatut attartortittakkatut neqeroorutigineqassapput, kisiannili attartortut inissianik inissiatut nammineq pigisassatut niuernermut akiusumik akilerlugit tigusinissamik kissaateqarpata, tamatumunnga Naalakkersuisut akornusiissanngillat”, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq. Kiisalu Blok P-mi attartortut tamarmik 2010-mi ukiakkut aamma 2011-mi ukiakkut ineqarnermut siunnersortinit pulaarneqassapput, attartortut ataasiakkaat peqatigalugit ataasiakkaanut iliuuseqarnissamut pilersaarusiortussanik. Tassani ilaatigut aningaasaqarnermut tunngasunik siunnersuisoqassaaq, ineqarnermut tunngasunik siunnersuisoqassaaq attartortullu kissaataannik ingerlateqqinnissamut ikiorsiisoqassalluni.

Inissiani pingasunik initalinni attartornermut akiliutissap 5.150 koruunit missaannik annertussuseqarnissaa, inissianilu marlunni initalinni 4.100 koruunit missaannik annertussuseqarnissaa naatsorsuutigineqarpoq.