Sisimiuni inissaqarniarnermut tunngasutigut isumaqatigiissuteqarniarput.

Sisimiuni inissaaleqinerup suli atuunnera nassuerutigalugu ataatsimoorluni iliuuseqarnissaq Kalaallit Nunaanni Namminersorlutik Oqartussat Qeqqatalu Kommuniata akornanni inissialiortiternikkut ataqatigiissumik sunniuteqarluar­tumillu suleqatigiinnissakkut, Sisimiuni ataqatigiissumik ukiunut arlalinnut inissialiortitsinissaq qulakkeerniarneqassaaq, tamatumuunalu aamma pilersaarusior­nerit toqqammaviginnerusut inissialiallu ineriartortinnissaat Sisimiunilu inissia­liortiterneq qulakkeerniarneqassallutik.

Suleqatigiinnissap piffissaq qaninnerusoq isigalugu siunertarivaa, Sisimiuni inissaaleqinerup inissialiornerulernikkut appartinneqarnissaa. Iliuusissat siulliit ilaattut Sisimiuni Akiani 2010-p aasaani pingasunik quleriilinnik tamarmik immikkut aqqaneq-mar­lunnik initalinnik inissialiortoqassaaq. Ukiuni qaninnerni Akiani inissiat taa­maattut arlaqarnerusut sanaartorneqassapput, ingerlaqqinnermilu allatut inissia­liornerit aamma isiginiarneqassallutik, tamatumani innuttaasut pisariaqartitaat tamatigoortumik inissaqartinniarlugit.

Alumiiniumik aatsiteriviliassaq piviusunngortinneqassappat, taava suleqatigiin­nissamik isumaqatigiissut annertusillugu Maniitsoq ilannguneqassaaq. Taamaattoqassappallu inissianik pisariaqartitsineq annertoorujusuanngussalluni, peqatigitillugu massakkumut misissuigallarnerit takussutissaqartilereerlugu, allatut aningaasaleeriaaseq Maniitsumi periarfissaqalerumaartoq.