Amerikap avannaata aamma Europap akornanni attavik - ammarpoq

Immap naqqatigut kabeleqarfimmik ammaaneq Canadami pisutut annertuutut oqaluttuarisaanikkullu pingaaruteqartutut isigineqarpoq, tamannalu aviisit arlallit saqqaanni oqaluttuassatut pingaarnertut saqqummersinneqaqattaarnerani takuneqarsinnaavoq, taakkununngalu aningaasaqarneq pillugu aviisi ”Business” ilaavoq.

- TELE-mut tuniniaanikkut siuarsaataavoq pitsaalluinnartoq, aammalu pilersaarutit pitsaasuummata, imaqarluarlutik eqikkangaallutillu politikkikkut niuernikkullu attaveqarfissanik pitsaasunik attaveqalernissamut periarfissaalluarluni, Ineqarnermut, Attaveqarnermut Angallannermullu Naalakkersuisoq Jens B. Frederiksen, Milton-imi immap naqqatigut kabeleqarfissap ammarneqarneranut peqataajartorluni Newfoundland – Labrador-imi St. John’s-imiissimasoq ilaatigut taama oqarpoq. Angalaneq septembarip ulluisa arfineq pingajuanniit aqqaneq aappaannut 2009 ingerlanneqarpoq.

Kalaallit Aallartitaasa aallarniutigalugu Memorial University of Newfoundland and Labrador pulaarpaat, tassanilu pingaartumik aalisarnermut imarsiornermullu ilinniarfik immikkut annertuumik pitsaasumik misigisaqarfigineqarpoq. Aalisarnermut, imarsiornermut nunalerinermullu ilinniartitaanerit tamarmik illumut ataatsimut katersorneqarsimapput, taamaalillunilu ilinniarneq ilisimatutut ilinniarnertut qaffatsinneqarsimalluni. Anguniagaq taanna aalisarnerup, imarsiornermik sinerissallu avataani uuliasiornermik ingerlataqarnerup tamarmiusup ineriartortinneqarneranut sunniuteqarluarsimavoq.
 
Tamatuma kingorna angalaneq Milton-imut ingerlaqqippoq, tassanilu immap naqqatigut kabeleqarfik ammarneqarpoq.

- Amerikap avannaata aamma Europap akornanni toqqaannartumik attaveqaatip sukkasuup pilersinneqarnissaa isumagigatsigu, Kalaallit Nunaat sinnerlugu kabeleqarfiup ammarneranut ilaasinnaagama tulluusimaarutigeqaara. Suliassap taassuma suliarineqarnissaanut aalajangernermi Tele Greenlandip siulersuisui, aqutsisui naalakkersuisuusimasullu annertuumik sapiissuseqarsimapput, tamatumani Kalaallit Nunaanni aningaasaliinissamut aningaasaqarnikkut aalajangiinerit annersaat pineqarmat, Jens B. Frederiksen oqarpoq.

Angalanerup ulluisa pingajuanni Shawn Skinner, nutaaliornermut, niuernermut attaveqarnermullu ministeri ataatsimeeqatigineqarpoq. Canadami ingerlatseqatigiiffik Government Broadband imminut ingerlattuuvoq, nalunaarasuartaaserisoqarfiannut pisortanit pigineqartumut assingusuusoq. Immap naqqatigut kabelip atorneqarnissaa, aserfallatsaalineqarnissaa iluarsaanneqartarnissaalu pillugu Kalaallit Nunaanni ingerlatseqatigiiffiit naalakkersuisoqarfiillu akornanni suleqatigiinnissamut isumaqatigiissusiortoqarnissaa isumaqatigiissutigineqarpoq.
Siunissami niuernikkut attaveqatigiittarnissat aamma oqaluuserineqarput.

Tamatuma kingorna angalaneq Nalco Energy-mut, Nukissiorfiit Nuna Oil-ilu kattullugit ingerlatseqatigiiffitsinnut assingusumut ingerlaqqippoq. Newfoundland – Labrador ukiut qulit missaasa matuma siornatigut nunap immikkoortuini piitsuunersaasimavoq, taamaattumillu nunap immikkoortuani uuliamik nassaartoqarmat pisuujunersat pingajuattut inissikkamik qanoq iliorsimanerlutik oqaluttuaraat. Paasissutissarpassuit saniatigut aamma innaallagissamut immap naqqatigut kabelimut, maani Kalaallit Nunaanni attaveqaatitsinnut atorluarneqarsinnaasumut misilittakkatik ilanngullugit oqaluttuaraat.

- Ullormi kingullermi Schlumberger ataatsimeeqatigaarput, tassanilu Kalaallit Nunaanni uuliamik ujarlernermi naatsorsuutigisatik pillugit nassuiaappaatigut. Isumalluarnerat, uanga isumalluarninnit anneroqisoq pissutaallunissaaq, attaveqaatitsinnik annertusaanitsinnut atatillugu canadamiut Kalaallit Nunaannut aningaasaliinissaannut periarfissat annertupput, Jens B. Frederiksen oqarpoq.

Aamma Inuussutissarsiornermut ministeri Ross Wisemann ataatsimeeqatigisimavaa.

- Ataatsimiinneq taanna pissarsiaqarfiulluartorujussuuvoq, tassanilu aamma paasinarsivoq Newfoundland – Labrador-ip nunatta akornanni niueqatigiinnikkut attaveqaatit annertusarneqarnissaat soqutigisorujussuugaa. Tamannali eqaatsumik ingerlassappat nunatta akornanni nassiussanik ilaasunillu assartuinermik toqqaannartumik pilersitsisoqarnissaa pisariaqarpoq. Pingaartumik St. John’s-imi nunap immikkoortua aningaasaqarnikkut pingaaruteqarpoq. Toqqaannartumik attaveqalernissamut kaammattuisoqassasoq aammalu tamatuma iluatsinnissaanut naalakkersuinikkut suliniuteqartoqassasoq akunnitsinni kissaatigaarput, Ineqarnermut, Attaveqarnermut Angallannermullu Naalakkersuisoq Jens B. Frederiksen naggasiivoq.