TAC
Naalakkersuisut tassaapput ukiut tamaasa ukiumut akuerisaasumik katillugit pisarineqarsinnaasunik aalajangersaasartut, ulluinnarni taaneqartartoq TAC (Total Allowable Catch). Aalisagaqatigiinnut immikkut tamanut TAC-imik aalajangersaasoqartarpoq kiisalu pisassiissutit agguataarneri aamma aalajangiunneqartarlutik.
Pisassiissutit
Pisassiissuteqartarneq imatut paasineqassaaq immami aalajangersimasumi aalisakkanut aalajangersimasunut tunngatillugu nunap pisarisinnaasai aalajangersarneqartut. Sumiiffit ilaanni saniatigut pisarisuukkanut pisassiisoqartarsinnaavoq aamma. Ullut aalisarfiit nunani allani, nunat ilaannit killilersuutitut atorneqarpoq. Assersuutigalugu 2011-mi Svalbard-ip eqqaani kalaallit aalisartui ullut aalisarfiit 450-it raajartassat kilisannissaannut periarfissaqarineqarput, nunat ataasiakkaat illugiilluni isumaqatigiissutit naapertorlugu.
Kalaallit Nunaat pisassiissutinik paarlaasseqatigiittarpoq illugiilluni isumaqatigiissutit toqqammavigalugit. Nunat paarlaateqatigiiffigineqartut tassaanerusarput Island, Norge, Savalimmiut, Rusland aamma EU. Isumaqatiginniarnerit/isumaqatigiissutit qanoq ingerlaneri apeqqutaallutik EU-p Kalaallit Nunaannit pisassiissutit pissarsiarisami ilai nunanut allanut ingerlateqqittarpai assersuutigalugut Norgemut, isumaqatigiissutigineqartut naapertorlugit.
Pisassiissutit agguaanneqarneri TAC/pisassiissutit agguaanneqarnerini pineqarpoq TAC-ip sinerissamut qanittumut aamma avataasiorluni aalisartunut agguaanneqarnera aamma nunant allat ataasiakkaat pisassiissutinik paarlaasseqatigiiffigineri. Aalisagaqatigiit ataasiakkaat nunat sanilerisagullu ataatsimoorussinnaasarpagut, soorlu Nunatta kitaani qalerallit Canadalu ataatsimoorussaraagut.
Uumassusilerisunit siunnersuineq
Uumassusilerisunit siunnersuineq Pinngortitaleriffimmit isumagineqarpoq. Peqassutsinik nakkutiginninnermit ilisimatusarnermik aammalu nunat tamat akornanni suleqatigiiffinnik assigiinngitsunik suleqateqarneq tunngavigalugu siunnersuineq ingerlanneqarpoq. Nunani allani suleqatigineqartut annertunerusumik tassaapput ICES (International Council for the Exploration of the Sea- Imavinni Misissuinerit pillugu Nunat Tamalaat Siunnersuisartoqatigiit) aamma NAFO (Northwest Atlantic Fisheries Organization - Atlantikup Avannaata Kitaani Aalisarneq pillugu Suleqatigiiffik).