Puisit amiinik Canadameersunik pisiortornerup unitsinneqarallarnissaanik Great Greenland A/S-imut kaammattuinerup 6. januar 2006-imeersup atorunnaarsinneqarnissaa Naalakkersuisut ulloq 19. maj 2006 aalajangiuppaat.
Naalakkersuisut naliliipput suliffeqarfik ammerivimmi naammassisinnaasanik tamakkiisumik atorluaaniarnermi ajornaquteqanngitsumik iliuuseqarsinnaaqqilertaria-qartoq, tamanna aningaasaqarnikkut sinneqartoornissamut pingaarutilerujussuum-mat. Qaqortumi ammerivimmi naammassisinnaasat ukiuni kingullerni ukiumut amminut 150.000-inut amerlisimapput tamannalu nunarsuarmi niuernermi unammillersinnaanissamut pisariaqartoq paasinarsisimalluni. Taamaattumik nunatsinni tunisa-nut ilassutitut Great Greenland A/S pisariaqassappat amminik Canadameersunik pisiortornissamut periarfissaqaqqilertariaqarpoq. Nunatsinni tunisat apriilip naanerani 2005-imi taamaalinerani tunisanit 10 %-imik ikinnerupput.
Ukiuni kingullerni tunisaqartarnerup paasinarsisippaa nunatsinni puisit amiinik piler-suineq ukiumit ukiumut nikerarsinnaasorujussuusoq taamaattumillu Great Greenland A/S ukiuni toqqortaasiviit amminik nunatsinneersunik ulikkaarneqarsinnaan-ngiffiini amminik Canadameersunik atuisinnaasariaqarluni. Pingaartumik sila tunisat amerlassusiannut sunniutilerujussuusarpoq, matumanili amminik Canadameersunik pisiortornikkut ammerivimmut aalajaatsumik pilersuisinnaaneq qularnaareqataaffigineqarsinnaavoq taamaalillunilu suliffeqarfiup unammillersinnaassusianik at-tasseqataallunilu ineriartortitseqataalluni. Tamatuma saniatigut aningaasaqarnikkut tunngaveqarluarnikkut suliffeqarfiup tunitsivinnik ikilisaannginnermigut kiisalu amminik tunisinermi akigissaartitsinermigut nunatsinni piniartukkormiunut sullissilluarsinnaanerussaaq.
Canadamiut puisinniartarnerat pillugu oqallinneq Aalisarnermut, Piniarnermut Nunalerinermullu Naalakkersuisoqarfimmit malinnaaffigeqqissaarneqartuarpoq tassanngaanniillu isumaqartoqarpoq Canada biologit, nersutit nakorsaat, sakkunik ili-simasallit puisinniartartullu qanimut suleqatigalugit ilusilersorneqartunik piniariaat-sit pillugit isumatusaartumik aalajangersagaqartoq. Canadami puisinniartarneq sakkortuumik sukumiisumillu nakkutigineqarpoq, tamatumalu sukkasuumik naakkittartumillu toqutseriaatsit nunanit NAMMCO-mut ilaasortaasunit akuerisaasut atorneqalernerat nassatarisimavaa.
Puisinik pisuussutitut atuineq aningaasaqarnikkut uumassusillillu eqqarsaatigalugit piujuaannartitsinermik tunngaveqarpoq, taamaattumillu amminik Canadameersunik pisiortornissamut periarfissiisoqaqqinnissaa kaammattuutigineqarpoq. Tamatumun-nga tunngatillugu inuiaqatigiinni sineriammiuni isorliunerusuni allatut isertitaqarnissamut periarfissakiffiusuni puisinniartarnerup attanneqarnissaa ineriartortinneqarnissaalu pillugit nunatta Canadallu ikioqatigiinnissaat pingaarutilerujussuuvoq.
Ikinngutinnersumik inuulluaqqusillunga
Finn Karlsen
Aalisarnermut, Piniarnermut Nunalerinermullu Naalakkersuisoq
Paasisaqarnerorusukkuit attavigisinnaavat Pisortaq Amalie Jessen oqarasuaat 34 53 04.