Naalakkersuisut maannakkut nunatsinni aalisarneq pillugu aaqqissuussamik politikkeqarnissaq naalakkersuinikkut ilusiliinissamik eqqarsaatigisatik killissarititatigullu piumasaqaatit nunatsinni aalisarnermik inuussutissarsiortut tamarmiusut ineriartortinnissaannut pisariaqartinneqartut saqqummiuppaat.
Naalakkersuisunut ilaasortap Simon Olsenip taamaammat soqutigisaqaqatigiiffippaalussuit aalisarneq pillugu ataatsimeersuarnissamut Nuummi ulluni 12. - 13. juni 2004-mi ingerlanneqartussamut peqataaqqullugit qaaqquai. Ataatsimeersuarneq pisarnertut allakkatigut tusarniaasarnermut taartitut atorneqassaaq.
Naalakkersuisunut ilaasortaq Simon Olsen inuussutissarsiortut ataatsimeersuarnermut ilanngussassaannik tusagaqarnissaminut assut qilanaarpoq. Oqaramimi:
- Naalakkersuisut neriuutigaat oqallinnissamut tunngavissiaq taanna ”Aalisarneq pillugu aaqqissuussamik politikkeqarnissaq” pimoorullugu ineriartortitsiniarluni kingunissalimmik suleqatigiilernissamut aallaqqaataajumaartoq. Juni 2004-mi aalisarneq pillugu ataatsimeersuarnermi angusat tusarfiginissaat Naalakkersuisunit qilanaaraarput, tassami peqataasut tusarniaanermut akissutaat 2004-mi Inatsisartut ukiakkut ataatsimiinnerannut saqqummiussassavimmut ilanngullugit suliarineqartussaammata. Sulineq taanna inuussutissarsiortut siunissami aaqqissuussivigineqarnissaata ilusilersorneqarneranut tunngaviussaaq.
Annertunerusunik paasisaqarusuttut Naalakkersuisut oqallinnissamut tunngavissiaat ataatsimeersuarnerullu ingerlanissaanik pilersaarut uani takusinnaavaat www.nanoq.gl aamma / imaluunniit Naalakkersuisunut ilaasortaq Simon Olsen imaluunniit allaffiup pisortaa Frans Heilmann oqarasuaat 34 50 00 atorlugu attaveqarfigisinnaallugit.
ataatsimeersuarnermut pilersaarut uani atuarsinnaavat