Aalisarneq pillugu Inatsisartut inatsisissaattut siunnersummi nutaami siunertarineqarpoq, ilaatigut atuisunit atoruminarnerusumik inatsimmik kissaateqarneq, ilaatigullu Inatsisartuniit kissaatigisat naaperiaaffiginiarlugit aalisarneq pillugu Inatsisartut inatsisaanni atuuttumi allannguisoqarnissaanik, kiisalu aalisarneq pillugu inatsimmi atuuttumi amigaatit pissusissamisuunngitsullu pigineqartut iluarsiiviginiarlugit.
Aalisarneq pillugu inatsit nr. 18, 31. oktober 1996-imeersoq maanna atuuttoq suliarineqaq-qaaramili arlaleriarluni allannguuteqartinneqartarpoq. Allannguutit 1997-imi, 1998-imi, 2001-imi, 2002-mi 2003-milu suliarineqarput. Siunnersuutip matuma siunertaraa allannguutit taakkua tamarmiusut inatsimmi ataasiinnarmiitinneqarnissaat.
Inatsisip atuuttup atuutsinneqarnerani kukkunernik amigaatinillu ataasiakkaanik naammattuugaqartoqarpoq, siunnersuummi iluarseriarneqartussanik.
Peqatigitillugu maanna aalisarneq pillugu inatsimmut atuuttumut tunngatillugu siunnersuummi oqaaseqatigiinnik iluarsiisoqarpoq. Aalajangersakkat inissitsiterneqarneri allannguuteqartinneqarput, taamaalilluni taakkua takulertoruminarnerulersinneqassallutik, taamatuttaaq qulequttanik arlaqarnerusunik ilanngussisoqarluni.
Peqatigitillugu siunnersuutip siornatigut inatsimmut atuuttumut nassuiaatit ataatsimoortilerpai. Nassuiaatit maanna atuukkunnaarmata, nassuiaatitoqqat atuukkunnaarsinneqarput nassuiaatillu nutaat suliarineqarlutik. Taamaalilluni inatsisissatut siunnersuut ataasiinnarmik nassuiaatitaqarpoq.
Allannguutit taakkua inatsimmik atuisunut pisariinnerulersitsinissaat ilimagineqarpoq.
Inatsisissatut siunnersuut pilersinneqannginnerani suliniutit iliuutsillu arlaqarsimapput, taakkuuppullu Naalakkersuisut siunnersuusiornerminni isumagisimasaat:
- 2004-imi aalisarneq pillugu isumasioqatigiittoqarpoq pingasunik tunuliaqutaasunik nalunaarusianik kingunilimmik aalisarnermut aaqqissuussaanikkut politikki pillugu. Tassuunakkullu siunnersuutigineqarpoq aalisarnermut inatsit nutarsarneqassasoq.
- Aalisarnermut aaqqissuussaanikkut politikkissatut siunnersuut Inatsisartut ukiakkut 2004-mi ataatsimiinneranni suliarineqarpoq akuerineqarlunilu,
- Allaffeqarfitsigoortumik Pisortaqarfimmi inatsimmik allannguisussanik suleqatigiissitamik pilersitsisoqarpoq,
- Immikkut ilisimasalimmik ataatsimiititaliamik arlaannaannulluunniit attuumassuteqanngitsumik pilersitsisoqarpoq, taassumalu misissorpaa raajarniarnermi akuersissuteqariaatsimut taartaasinnaasumik. Ataatsimiititaliap nalunaarusiaa itilisagaalluartoq tunniunneqarpoq, januar 2006-mi pisortatigoortumik saqqummiunneqarpoq, aamma Inatsisartut upernaakkut 2006-mi ataatsimiinneranni suliarineqartoq.
- Ataatsimiititaliallu pineqartup inassuteqaatai inatsissatut siunnersuummi isumagineqarsimapput,
- Aalisarneq pillugu Siunnersuisoqatigiit suliap ingerlaarnerani malinnaatinneqarput aammalumi missingersuummik tusarniarneqarlutik apeqqutinillu saqqummiussiffigineqarlutik,
¿Taaneqartut saniatigut arlaleriaqalunga KNAPK-p siulittaasua sumiiffinnilu KNAPP-t arlalissuit ataatsimeeqatigisarsimavakka, ataatsimiinnernilu inatsisissatut siunnersuut pitsaasumik tigulluarneqarpoq tapersiutinillu nalunaarfigineqartarlunga¿, Finn Karlsen oqarpoq.
Aalisarneq pillugu Siunnersuisoqatigiilli toqqarsimavaat apeqqutit arlallit saqqummiunneqartut akiniarnagit, siunnersuutip tusarniutigineqarneranut ilanngullugit tunniunneqartunut. Apeqquteqaatit taakkua matumani siunnersuummut ilanngunneqanngillat, Naalakkersuisut piumasarimmassuk akissuteqaatit aalisarnermik inuussutissarsiuteqartut attuumassuteqartullu allat suleqatigalugit suliarineqarumaarmata.
Aalisarneq pillugu Siunnersuisoqatigiit ilaasortaasa akissuteqarnerminni siunnersuutigaat suliaq immikkoortunut arlalinnut avillugu suliarineqassasoq, tamannalu siunnersuut Naalakkersuisut toqqarpaat malinniarnagu. Imatulli paasineqassanngilaq suliaq tuaviuussaasimasoq, taamaattoqanngilarli, allannguutissatut siunnersuuterpiaat pisariaqarput aammalu ukiuni arlalinni Inatsisartunit ujartorneqarsimalluni.
Naalakkersuisoq Finn Karlsen naggasiilluni oqarpoq apeqquteqaatinut akissuteqaatit siunissami aalisarnermut inatsimmut allanngueqqinnermik siunissami pisariaqartitsileqqissinnaasoq. Matumuuna missingersuut allannguutissanik mattussinngimmat, kisiannili pisariaqartitsineq malillugu allanngortinneqartarsinnaammat.
Inatsisissatut siunnersuut tamarmi, nassuiaatit aammalu tusarniaanermi akissuteqaatit il.il. pisortaqarfiup quppersagaani www.nanoq.gl ¿kut aaneqarsinnaapput.
Ikinngutinnersumik inuulluaqqusillunga
Finn Karlsen
Aalisarnermut, Piniarnermut Nunalerinermullu Naalakkersuisoq