Nunatsinni umiarsuarnik puisinniutinik aningaasarsiutigalugulu puisinniarnermik atuinissaq pillugu sunik periarfissaqarneranik aporfissaqarneranillu sukumiisumik naliliisussanik suleqatigiissitanik Aalisarnermut, Piniarnermut Nunalerinermullu Pisortaqarfimmit, Inuussutissarsiornermut Pisortaqarfimmit, Pinngortitaleriffimmit, Great Greenland A/S-imit aamma KNAPK-mit peqataaffigineqartunik pilersitsisoqarnissaa Naalakkersuisut poorski sioqqullugu ataatsimiinnerminni aalajangiuppaat.
Erseqqissaatigineqassaaq uani pineqanngilluinnarmat puisit piaraannik anaaleraalluni puisinniartitsinissamik misissuititsinissaq, soorlu TV-Avisi ulloq 20. april nal. 21.00 taamatut nalunaaruteqaraluartoq. 11. april 2007-mi tusagassiorfinnut nalunaarut aammalu Aalisarnermut, Piniarnermut Nunalerinermullu pisortaanik apersuinerup killorneqarsimaneranit ilaannakortumik tigusinikkut annertuumik tusagassiortuniit sangutitserujussuartoqarpoq.
Naalakkersuisut itigartitsinermikkut Ammerivik kaammattorpaa Europami pissutsit ilungersunartut Europami nunarpassuit puisit amiinik niuernermik inerteqquteqalernissamik anguniagaqarfigisaat aamma eqqarsaatigalugit suleqatigiissitap kaammattuutai utaqqeqqaaqqullugit.
Great Greenland qinnuteqaataa naatsumik taallugu:
-
GG qinnuteqarpoq qoorortuut atorlugit umiatsiaaqqaniit puisinniartitsinissamut, tassa pisarnertut pissutsit atoreersut malillugit. Piniartitsinermi Ammeriviup piniartut sulisoriniarpai akilerlugit.
-
Puisit aalisariummut angisuumut tulaanneqartassasut, "angallat tunitsivik anaanaq"-tut taallugu. Tamanna nutaajuvoq. Periusitoqaq tassaavoq piniartut ataasiakkaarlutik puisinniartut angallateeqqat pujortuleeqqalluunniit atorlugit, namminneq puisi pilallugu kiisalu puisip amia panerserlugu imaluunniit nutaatut kitaani tunitsiviit 71-t arlaannut tunillugu.
Taamaattumik uani pineqanngilluinnarpoq puisit piaraannik hakapika atorlugu anaaleraalluni piniartitsisalernissamut periarfissanik misissuititsinissaq.
Great Greenlandip qinnuteqarnera tunngaveqarpoq siulersuisuisa akuerinikuusaat "Ilusissatut pilersaarutit 2005-2010". Tassani pilersaarummi ilaatigut allassimasoqarpoq imatut; "Pisiortornermut atatillugu naleqquttumik angallateqarnissaq sinerissami kangiani, kitaani, avannaani kujataanilu tunitsiviusinnaasoq, puisinniarfiusuni."
Suleqatigiissitaq nalilersuisussaq siullermeerluni 26. april 2007 ataatsimiissaaq.
Erseqqissaatigeqqinneqassaaq Naalakkersuisut suliniutigiuarmassuk pisuussutit uumassusillit nungukkiartuutaanngitsumik piniarneqartarnissaat kiisalu piniarneq ingerlanneqartassammat atortut piniariaatsillu pitsaasut atorlugit.
Inussiarnersumik inuulluaqqusillunga
Finn Karlsen
Aalisarnermut, Piniarnermut Nunalerinermullu Naalakkersuisoq