Qilalukkat qaqortanik aamma qernertanik pisassiissutit 2011-mi sinneruttut 2012-imut nuunneqarput

Qilalugarniarnermut nalunaarutip nutaap akuerineqarneratigut massakkut pisassiiffiusup siuliani pisarineqanngitsoorsimasut pisassiiffimmut tullermut nuunneqarnissaat ajornarunnaarpoq.  Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 7, 29. marts 2011-meersumi § 3, imm. 5-imi allassimavoq: ”Qilalukkanik qaqortanik imaluunniit qilalukkanik qernertanik nunap aggornerata ataatsip killeqarfiata iluani pisassiissutit atunngitsuukkat pisassiissutinut tamarmiusunut nunap aggornerani pineqartumi ukiup pisassiiffiusup tullianut nuunneqarsinnaapput.”

Pisassiissutinik agguaassisartut ukiumi atuuttumi qilalugaqatigiinni ataasiakkaani pisassiissutit pisarineqanngitsoorsimasut atornissaannut inassuteqaataat Naalakkersuisunut ilaasortap Ane Hansen-ip akuersissutigaa, taamaasilluni .qilalukkat qaqortat qernertalluunniit qilalugaqatigiit aalajangersimasut iluanni pisassiissutit kommunimi nungunneqarsimanngippata taakkua kommunip aappaagumut pisassaanut tamarmiusunut nuunneqarsinnaapput.

Pisassiissutit 2011-miit sinneruttut 2012-imut nuuneqartussat agguarniarneqarneri Aalisarnermut, Piniarnermut Nunalerinermullu Naalakkersuisumiit akuerineqarnerata kingorna aamma pisassiissutinik agguaassisartuniit tassaasut KANUKOKA, KNAPK aamma APNN-imiit innersuunneqarnerata kingorna imaapput:

Aammalu kommunimi aalisartut piniartullu kattuffiinik tusarniaareernermikkut pisarineqanngitsoorsimasut qanoq atorneqarnissaat kommunit aalajangertassagaat.

Pisaqarnissamut piumasaqaatit (www.lovgivning.gl)
Qilalukkanik qaqortanik qernertanillu piniarneq ingerlanneqartussaavoq:

• Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 7, 29. marts 2011-meersoq malillugu.
• Akuersissutit siusinnerusukkut tunniunneqarsimasut tamarmik 1. januar atorunnaassapput, 2012-imullu akuersissutit nutaat annertunerusumik piniarnermit tunngasunik paasissutissartallit atorneqalissapput.