Naalakkersuisut piumassuseqarnerat qulareqqunagu Kinamiut niuerfiat neriorsorneqarpoq

”Kinamut tikeraarneq iluatsilluaqaaq, paasisaqarfioqaluni paasissutissanillu pissarsiorfiulluarluni”, Aalisarnermut, Piniarnermut Nunalerinermullu Naalakkersuisoq Ane Hansen, Great Greenlandip puisit amiinik tuniniaanikkut Kinami suliniuteqarneraniit uteqqammersoq, oqarpoq. ”Puisinniarnerup puisineersunillu tunisassiornerup ineriartortinnissaannut Naalakkersuisut piumassuseqarnerat qulareqqunagu Kinamiut niuerfiat neriorsorneqarpoq, tamatumalu Kinamiut tunisassiorfiisa aningaasaliisoqaannarnissaannut aqqutissiuussisinnaavoq.”

Great Greenlandip Beijing Fur Fair (amernik amernillu atisassianik nittarsaassineq) 2012-imut ilaanissaanut Naalakkersuisoq Ane Hansen Great Greenlandimit aaqqissuussineq peqataaffigeqqullugu qaaqquneqarpoq, saqqummersitsinerup saniatigut Beijingimi qallunaat aallartitaqarfiata Shanghai-imilu qallunaat konsuleqarfiata ataatsimiinnerannut aammalu Great Greenlandip kiniserit politikeriinik puisit amiinullu atatillugu niuernikkut attavigisaasalu ataatsimeeqatigiinnerannut peqataalluni.

Bejing Fur Fair 2012 aamma kiniserinik niuernikkut attavigisanik politikerinillu ataatsimeeqateqarneq
”Nunarsuarmi ameerniarfiit amernillu atisalianik niuerfiit annerpaartaasa ilaat taamaalillunga peqataaffigaara, tassanilu Great Greenlandip amernik atisaliai nutaat piutit amernik sanaat allat saqqummersinneqarput. Nittarsaassiviit allarpassuittaaq pulaarpakka, ilaatigut norskit canadamiullu puisit amiinik ingerlatsiviisa sinniisaannik oqaloqateqarlunga. Soqutiginaqaaq aammalu nunarsuarmi puisit amiinik niuernikkut ajornartorsiutit unamminartullu pillugit paasissutissanik nutaarpassuarnik pissarsiffigaara, Ane Hansen oqaluttuarpoq.

”Malugaara Great Greenlandip tunisassiai, Kalaallit Nunaallumi, Great Greenland puisinniarnerlu pillugu DVD ingerlaartoq tunngavigalugu ornigussimasunit assorsuaq soqutigineqartut, Naalakkersuisoq oqaluttuarpoq.

”Puisit amiinik tuniniaaneq annertusarniarlugu ingerlatattaaq Great Greenlandimit taassumalu Kinami suleqataanit aallartinneqarsimasut takunissaannut periarfissinneqarpunga. Tunisassiortuttaaq siunissami puisit amiinik atuisinnaanissamik soqutiginissinnaasut naapippakka. Takusinnaavara Kinami ingerlatanik aallartinneqartunik Naalakkersuisut tapersersuinerata takutittarnissaa iluaqutaasoq.”

”Qularinngilara kimamiut politikerit ataatsimeeqatigisatta aamma inuiaqatigiinnguanik Kalaallit Nunaattut ittunik suleqateqarnerup immikkorluinnaq ittuunera paasilluaraat. Ingerlatanut assigiinngitsunut tunngatillugu politikikkut annertunerusumik paasinninneq ataatsimiinnerni taaneqartuni pilersippara. Ataatsimiinnerni oqaatigaara Kalaallit Nunaat Kinalu inoqassutsimikkut niuernikkullu periarfissatigut assigiinngikkaluaqalutik arlalinnik assigiissuteqartut. Takusinnaavara Kina niuernikkut annertuunik periarfissaqartoq”, Ane Hansen oqarpoq ilanngullugulu oqarluni tamanna annertunerusumik iliuuseqarfiusariaqartoq Kalaallit Nunaat tunitsivissamik annertunerusumik piviusunngortitsissappat.

”Kinami niuernikkut attavigisat erseqqissorujussuarnik saqqummiussuipput, uangalu isumaqarpunga Great Greenlandip tamakkua tusaatissatut tigoorarai. Tamakkua ilagaat tunisassianik pilersuinerup annertunerunissaanik isumannaannerunissaanillu aammalu puisit amiinik amerlanerusunik pitsaassutsinillu pitsaanernik piumasaqarpoq. Imaappoq puisit amiinik tunisassiornermut attuumassutillit tamarmik, ilaatigut tunisassiap, piniartunit tunniunneqarneraniit passunneqarnerata, qitulisarneqarnerata nalaani tamatumalu kingornagut pitsaanerpaanissaa anguniarlugu passussisarneq. Niuernikkut attavigisat Kalaallit Nunaanniit puisit amii, puisillu amiinik atisaliat suleqatigiinnerullu tamatuma annertusarnissaa soqutigiuarpaat.

”Maluginiarparattaaq Kalaallit Nunaannut tunngatillugu aammalu nioqqutissanik sunik Kinami niuerfimmut neqerooruteqarsinnaanitsinnut tunngatillugu paasissutissanik pisariaqartitsineq annertoorujussuusoq, Ane Hansen, Royal Greenlandip aalisakkanik suliffissuinik suleqataanillu Kinami Qingdao-miittunik pulaarsimasortaaq, oqarpoq.

Qallunaat Beijingimi Ambassadeqarfianik Qallunaallu Shanghai-imi konsuleqarfiannik ataatsimeeqateqarneq
Kinalu tikeraarnermi qallunaat Ambassadeata Beijingimiittup Kina pillugu paasissutissarsinissaq aammalu amminik amernillu tunisassianik eqqussinermut tunngatillugu malittarisassat suunerisa paasinissaat siunertaralugu ataatsimeeqatiginissaanut periarfissaqarsimavortaaq. Ambassadip sulisuni aalisakkanik amernillu Kinamut eqqussinermut tunngatillugu Kinami inatsisinik paasisimasallit uagutsinnut neqeroorutigai, tamannalu angalaqatigiinnut assorsuaq iluaqutaasimavoq. Den Danske Ambassade oqarpoq nioqqutissanik eqqussuineq akuersissutinik nalinginnaasunik tunngaveqarpat ajornartorsiutissaqartussaanngitsoq. Great Greenland A/S-ip niuernikkut attavigisani aqqutigalugit akuersissutit piumasarineqartut pigereerpai, imaappoq Kalaallit Nunaata suliassaraa niuernikkut iliuuseqarnermik ingerlatamik annertusaanissaq aammalu suleqatigiiffioreersunik annertusaallunilu pisisartunik nutaanik attavissarsioqqinnissaq.

Inuussutissanik peqqinnissamullu atugassanik puisimeersunik Kinamut eqqussisarneq eqqarsaatigalugu allarluinnarnik assullu amernik qitulisakkanik eqqussuinermut naleqqiullugu pisariunerujussuarnik aalajangersagaqarpoq. Siullermik Kalaallit Nunaata Kinallu akormanni pisortatigoortumik atsiukkamik isumaqatigiissuteqaqqaarsimasariaqarpoq kalaallit nunaanneersoq tunisassiortoq, assersuutigalugu puisip neqaanik assigisaanillu, eqqussinissamik kissaateqarpat. Tamatuma anguniarnera ilaatigut ukiut tallimat angullugit sivisussuseqarsinnaasarpoq aammalu piumasaqarluni Namminersorlutik Oqartussat kalaallit nunaanneersoq tunisassiortup taamatut periarfissaqarnissaa tunisassiortup Kinamilu oqartussat akornanni aqqutissioqqaarsimasariaqassavaat.

Kalaallit angalatitaat aamma soqutiginartumik pissarsiffiusumillu Shanghai-imiittoq Det Danske Konsulat ataatsimeeqatigaat, taassumalu ilisimatitsissutigaa konsulatip Kalaallit Nunaat nioqqutissanik niuernikkullu attavigisassanut tunngatillugu sutigut ikiuuffigisinnaaneritsik. ”Taamatut ajunngitsumik angalaqatigiit Shanghai-imi konsulatimit ilassilluarneqarnerput siunnersorneqarnerpullu qujamasuutigeqaara. Pingaartorujussuuvormi Kalaallit Nunaata Shanghai-imi Det Danske Konsulatimik inatsisinut Kinamilu naalakkersuisunik oqartussanillu attaveqarnermik qanimut suleqateqarnermik pilersitsinera, Aalisarnermut, Piniarnermut Nunalerinermullu Naalakkersuisoq oqarpoq.