Uummannap eqqaani qaleralittassiissutit qaffanneqarput

Naalakkersuisut ippassaq ataatsimiinnerminni aalajangerpaat aqutsiveqarfimmi Uummannami sinerissap qanittuani qaleralittassiissutit 500 tons-inik qaffanneqassasut.

Taamaalilluni Uummannap eqqaani qaleralittassiissutit ukiup sinneranoortut maannamut qaleralittassiissutitut sinneruttut ilanngullugit 549 tonsiulerput.

Ilanngullugu Naalakkersuisut aalajangerpaat pisassiissutit 100 tonsiinnanngorpata sinneruttut aalisariutinut minnernut aalisarneqartussanngortinneqassasut. Aalisariutit annerusut sinerissap qanittuani Upernavimmut aamma Qeqertarsuup Tunuanut qaleralinniarnissaminnut tamatuma kingorna innersuunneqassapput. Aalisariutinut anginerusunut naannerpaaffissatut killigitinneqartoq tassaavoq 8 meter, tamanna Kalaallit Nunaanni Aalisarsinnaanermut Akuersissutinik Nakkutilliisoqarfimmit, KANUAANA-mit, nakkutigiuminarnerussammat.

- Taama qaffaassuteqarnitsinnut atatillugu ilanngullugu piumasaqaatigaarput aalisartut pisaminnik nalunaarsuisarnerat pitsaanerusariaqartoq, aammalu qaleralinniarnermi maleruagassat pitsaanerusumik malinneqartariaqarnerat erseqqissaatigissavarput. Tassami taamaaliornikkut qaleralinniarnerup ingerlarnganik nalilersuinerit pitsaanerulissapput, taamaalilluni peqassutsip allannguutigisinnaasai ajornannginnerusumik malittarineqarsinnaalissallutik. Eqqaamassavarpummi aamma Pinngor­titaleriffiup tutsuiginartumik siunnersuuteqarnissaanut atatillugu allattaavitsigut nalu­naarusiortoqartarnera qitiulluinnartumik inissisimammat, Aalisarnermut, Piniarnermut Nunalerinermullu Naalakkersuisoq Ane Hansen oqarpoq.

Naalakkersuisut aqutsiveqarfimmi Uummannami sinerissap qanittuani qaleralinnik aalisarnermut TAC-itut pisassiissutit 2010-mut 5.000 tonsinut 2009-mi aalajangiunnikuuaat.