Kapisillit nalunaaqutaannut akissarsiaq 2010 - Per Nukaaraq Hansen-imut

Aalisarnermut, Piniarnermut Nunalerinermullu Naalakkersuisup Ane Hansen-ip 2010-mut kapisillit nalunaaqutaannut akissarsiaq 1.500 U.S. dollars-inik annertussuseqartoq Per Nukaaraq Hansen Ivittuuneersumut, tallimanngorneq 27. august 2010 tunniuppaa.

Per Nukaaraq Hansenip Ivittuut eqqaani 2009-mi kapisilittami nalunaaqutaa nassiussimavaa. Kapisilik Canadami Restigouche River maj 2008-mi nalunaaqutserneqar-simavoq. Kapisilinnut nalunaaquttat nassiunneqartut akornanni makitsineq pivoq NASCO-p ukiumoortumik ataatsimiinnerani juni-mi 2010 Quebec City, Canada-mi.

NASCO (North Atlantic Salmon Conservation Organistation) kapisilinnik ilisima-tuussutsikkut nalunaaqutsiisarnermik suliniummik kapisillit nalunaaqutaannik utertitsisarnermik pitsanngorsaanermik ingerlatsivoq. Kapisillit iluaqutigineqarnerat taakkulu ingerlaartarnerannut ilisimasat pitsanngortinniarlugit kapisillit nalunaaqutserneqartarput.

Kapisilinnik nalunaaqutsersuisarnermut suliniuteqarnermut atatillugu NASCO-p immikkoortuini sisamaasuni Ataatsimiititaliani tamani ukiut tamaasa 1.500 U.S. dollars-inik annertussusilimmik akissarsisitsisoqartarpoq. Kalaallit Nunaata kitaani Ataatsimiititaliami Canada, USA, EU aamma Kalaallit Nunaat sinniisuutitaqarput.

Nunatsinni sunngiffimmi inuutissarsiutigalugulu aalisartut kapisilinnut nalunaaquttanik Pinngortitaleriffimmut nassitsigunik aappaagu NASCO-p ukiumoortumik ataatsimiinnerani makitsinissamut peqataanissamut periarfissaqarput. NASCO aappaagu ukiumoortumik ataatsimiinnissaa pissaaq Ilulissani juni 2011-mi.

Aalisarnermut, Piniarnermut Nunalerinermullu Aqutsisoqarfiup Naalakkersuisoqarfiullu aammaarlugu erseqqissaatigeqqissavaa nunatsinni sunngiffimmi inuutissarsiutigalugulu kapisilinnik aalisarnerit tunisaqarnerillu tamarmik GFLK-mut nalunaarutigineqartassammata. Nalunaarnissamut immersugassat kommunimi imaluunniit nittartakkami uani pissarsiarineqarsinnaapput. Ukioq manna kapisilinniarneq 1. august-imiit 31. oktober 2010-mut ingerlanneqarpoq.

Maleruagassat Kapisilinniarneq pillugu Namminersornerullutik Oqartussat nalunaarutaat nr. 21, 10. august 2002-meersumi atuarneqarsinnaapput.