Ane Hansen nunatta avannaarsuanut

Nunatta avannaarsuani aalisarnermi piniarnermilu pissutsit qanimut paasisaqarfiginiarlugit Aalisarnermut, Piniarnermut Nunalerinermullu Naalakkersuisoq Ane Hansen 5. – 12. august 2010 avannaani angalaassaaq.

Angalaffigineqartussat tassaapput Upernavik, Nuussuaq, Kullorsuaq, Savissivik kiisalu Qaanaaq. Ingerlaarnermi ilanngullugit piniariartarfiit Qimusseriarsuarmiittoq, Tuttulissuarmiittoq, Innaanganermiittoq allallu angumerineqarsinnaasut paasisassarsiorfigineqassapput.

Naalakkersuisup angalanermini ingiallortigissavaa Qaasuitsup Kommuniani Pisuussutit Uumassusillit pillugit Ataatsimiititaliami siulittaasoq Jens Danielsen.

Angalanermi piniartut aalisartullu ataatsimeeqatigisarnerisa saniatigut innuttaasunik ataatsimiititsinerit ingerlanneqartassapput, ilaatigut aalisarnermut inatsisissaq maanna tusarniutigineqartoq pillugu paasissutissiisoqartassalluni.