Aalisarnermi akiliut atuutilissaaq

Ulloq 1. januar 2010-miit atuutilersumik Inatsisartut aalisarnermut tunngasutigut atuinermut akiliut atulersippaat.

Ulloq 1. marts 2010 aalisarnermut tunngasutigut atuinermut akiliummut nalunaarut atuutilerpoq.

Atuinermut akiliummik aaqqissuussinerup kinguneraa, avataasiorluni aalisarnermi akiliutinik akiliisoqartalernissaa kiisalu sinerissamut qanittumi raajarniarnermi, sinerissamulli qanittumi allanik aalisarnerni akuersissummut akiliummik akiliisoqartassaaq.

Avataani sinerissamiluunniit qanittumi raajanik aalisarnermi akiliummut akiliutaasussaq, pisassiissutit tunniussat tunngaviliullugit naatsorsorneqartassaaq. Akiliut tonsimut ataatsimut 60 kr.-iuvoq, aalisakkat qaleruallilluunniit sorliit apeqqutaatinnagit.

Umiarsuaatileqatigiiffinnit angallatinillu Kalaallit Nunaanni najugaqavissunit sunik tamanik aalisarnermik ingerlatsisunut akiliummut akiliisussaatitaaneq atuuppoq.

Sinerissamut qanittumi aalisarnermi, sinerissamulli qanittumi raajarniarnerit ilanngunnagit, akuersissummik atulersitsinermut akiliut akilerneqartassaaq. Akuersissummut ataatsimut akiliut 1.500 kr.-inut aalajangerneqarpoq.

Taamaattorli umiatsiaararsortut taamaallaat akiliut 1.500 kr..-iusoq akilertussaassavaat. Taavalu akiliut siulleq akuersissummut siullermut akilerneqarpat taava akuersissutit allat akiliummik akiliinani atulersinneqassapput.

2010 januarip aallaqqaataaniit nutaatut sinerissamut qanittumi saarullinniarnermut atatillugu atuutilersinneqarpoq akuersissuteqaqqaarluni aalisarsinnaaneq. Sinerissamut qanittumi saarullinniarsinnaaneq akiliuteqarnissamik piumasaqaatitaqarpoq, soorlu sinerissami qanittumi akuersissuteqaqqaarluni aalisarsinnaanermi taamaareersoq.