AC-fuldmægtigi

Ulapaarfiusumi sulisinnaavit sapiissuseqarlutillu, taava Kalaallit Nunaanni inuussutissarsiutit pingaarnersaanni piginnaasavit atornissaannut periarfissaqarputit.

Kalaallit Nunaanni Namminersornerullutik Oqartussat, Aalisarnermut, Piniarnermut Nunalerinermullu Aqutsisoqarfiata Aalisarnermut immikkoortortaqarfia sisamanik AC-fuldmægtigissarsiorpoq.

Aalisarnermut Immikkoortortaqarfimmi fuldmægtigitut siammasissumik piginnaasaqartariaqarputit peqatigisaanillu ulluinnarni ulapaarfiusinnaasartumi tamakkiisumik malinnaasinnaasariaqarlutit.

Kalaallit Nunaata imartaani aalisarnermik aallartinneqarsimasut iluini naalakkersuinikkut anguniakkat anguneqarnissaannut ikiuunnissamut Aalisarnermut Immikkoortortaqarfiup suliassaraa – tamatumalu ilutigisaanik Kalaallit Nunaata nunat tamalaat akornanni aalisarnikkut suleqatigisai isumagissallugit. Aalisarnikkut inuussutissarsiuteqarneq naalakkersuinikkut suliaqartunit eqqumaffigineqarnerat annertuvoq imminnut akerleriittorpassuarnik soqutigisaqarfiusoq, suliffigissallugu pissanganartuuvoq unammillernartuullunilu.

Aqutsisoqarfimmi sulisut 40 missaaniippugut immikkoortortanut qanimut suleqatigiittunut sisamanut agguarsimasut. Suleqatigiinni AC-fuldmægtigit assigiinngitsunik ilinniagartuut quliupput, taamaalilluni suliffik tamatigoortoq qulakkeerneqarpoq suleqatinillu isummersoqatigiissinnaaneq periarfissaalluarluni. Suliassat assigiinngiiaartut, suliassat akisussaaffimmik nassatallit unamminiagassartallillu inuttut ineriartornissamut periarfissiilluartunik neqerooruteqarpugut aamma Aalisarnermut immikkoortortaqarfiup akisussaaffeqarfiisa iluanni nammineq isumassarsiat suliniutillu nammineq aallartitat ingerlannissaannut periarfissaqarluarpoq. Taakkununnga suliassat assigiiaarnerusut ilaapput, sulisut tamarmiullutik suliassamittut isigisariaqagaat.

Atorfimmut atatillugu angalasarnissaq naatsorsuutigineqarsinnaavoq.

Aalisarnermut Immikkoortortaqarfimmi fuldmægtigitut ilaatigut makku suliassaraatit:

• Aalisarnermut Immikkoortortaqarfimmi suleqatit attuumassuteqartut peqatigalugit suliassanik aalajangersimasunik suliaqarneq
• Inatsisinik, nalunaarutinik il.il. suliaqarneq misissuinerlu
• Inatsisit qanoq paasineqarnissaannik nassuiaaneq
• Politikkerinik sullissineq
• Allakkianik, nalunaarusianik, nassuiaatinik il.il. suliaqarneq
• Nunat tamalaat akornanni suliassanik suliaqaratarsinnaaneq
• Namminersornerullutik Oqartussat iluani Naalakkersuisoqarfinnik Aqutsisoqarfinnillu oqaloqateqarneq
• Suliassanik aalajangersimasunik isumaginninneq
• Sullissinissamik isumaqatigiissutinik isumaqatigiissutinillu allanik misissuineq nalilersuinerlu.

Naatsorsuutigaarput:

• Suliffimmi Naalakkersuinikkut aqunneqartumi sulisinnaasutit pisortallu aqutaannik soqutigisaqartutit
• Sulianut attuumassutilimmik ilinniagartuutut naammassisaqarsimasutit
• Suleqatiginnissinnaassuseqartutit namminersorlutillu sulisinnaasutit
• Suliassanik amerlasuunik naammassinnissinnaassuseqartit sukkasuumillu ajornartorsiutinik aaqqiisinnaasutit
• Aqutsisoqarfiup suliassaqarfiini tamani ulapaarfiup nalaani unneqarillutit suliassanik naammassinnissinnaassuseqartutit
• Immikkoortortaqarfimmi ineriartorneq pillugu ingerlaavartumik malinnaasinnaassuseqartutit

Neriuutigaarput:

• Siusinnerusukkut atorfimmi aqutsinikkut misilittagaqartutit
• Kalaallit Nunaannut aamma/imaluunniit aalisarnermik ilisimasaqarsinnaasutit

Akissarsiat- atorfininnermilu atugassarititaasut:

Akissarsiat atorfinitsitaanermilu atugassarititaasut, matumani sulinngiffeqarninni akiliunneqarlutit angalanermut pisattallu angallanneqarnerinut Namminersornerullutik Oqartussat Kattuffiullu isumaqatiginninniarnermik piginnaatitaaffeqartup akornanni isumaqatigiissutit atuuttut naapertorlugit pissapput.

Atorfimmut atatillugu inissaqartitsisoqarsinnaavoq malittarisassat atuuttut naapertorlugit ineqarnermut qularnaveeqqummillu akilerneqartussamik. Ullumikkut Nuummi inissamik pissarsiniarneq ajornakusoortorujussuummat ajoraluartumik utaqqisariaqarnissat naatsorsuutigisariaqassavat. initaavinnissavit tungaanut inissikkallarneqarfissannik isumaginnikkumaarpugut.