Akileraarutinit utertoorutissallit akiligassaqarpata ilanngaaffigineqassapput

Ukununnga akiitsunut ilanngaassisoqassaaq:

• Akileraarutinut akiitsuutinillu akileeqqusilluni piumasaqaatit taakkualu erniaannut sullissinermullu akiliutit ilanngullugit piumasaqaatit tamaasa.
• Ineqarnermut akiliutinut, qularnaveeqqusiissutitut uninngatitanut inissianullu attartortittakkanut Namminersornerullutik Oqartussanit pigineqartunut iluarsartuussinermut akiligassanut piumasaqaatit tamaasa.
• Illuliornermut tapersiissutinik taarsigassarsiat inuussutissarsiutinullu tapersiisarfimmit taarsigassarsiat, Namminersornerullutik Oqartussanit taarsigassarsiaritinneqarsimasunut piumasaqaatit tamaasa.
• Kallerup inneranut / imermut / kiassarnermullu Nukissiorfimmit akiligassatut piumasaqaatit.
• Ilinniartuunersiutitut taarsigassarsiarisimasanut piumasaqaatit.
• Namminersornerullutik Oqartussanit imaluunniit namminersornerusut suliffeqarfiutaasa arlaannit akiligassatut piumasaqaatit allat suungaluartulluunniit.

Inangiineq, Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat nr. 3, 2. maj 1996-imeersoq, Inatsisartut inatsisaatigut nr. 4-kut 26. april 2007-imi allanngortinneqartukkut akiligassanik akiliisitsiniarneq ukununnga tunngatillugu pissaaq:

• Piumasaqaatit Kalaallit Nunaanni kommuunit arlaata ikiorsiissutinik utertitsisussaatitaanikkut akiliutigigallarsimasai.
• Piumasaqaatit Kalaallit Nunaanni kommuunit arlaata pilersuisutut akilersuutinut naafferartumik siumoortumik akiliutigigallarsimasai.
• Piumasaqaatit Kalaallit Nunaanni kommuunit arlaata inuussutissarsiornermut tapersiissutitut taarsigassarsiarititai.

Arsaarinninneq pissaaq, Kalaallit Nunaanni Eqqartuussisarnermut inatsimmi kap. 7, § 1, imm. 2 & 3 naapertorlugu pinngitsaaliissummik akiitsorilersimasat, taakkulu ukuupput:

• Taarsigassarsianik imaluunniit taakkua erniaannut illuutinik imaluunniit pigisanut tiguinnarnut pisortanit qularnaveeqqutigineqarsimasunut taarsiisussaatitaanermut piumasaqaatit.
• Pisortat inissiigallarnermut, kiassarnermut, kallerup inneranut, imermut eqqaavilerinermut anartarfilerinermullu akiliutinik piumasaqaataat.
• Pisortanut akileraarutit akitsuutillu Kalaallit Nunaanni inatsit atuuttoq naapertorlugu akiligassat.
• Piumasaqaatit pilersuisutut akilersuutinut Kalaallit Nunaanni oqartussaasunut akiitsunut tunngasut.
• Piumasaqaatit pilersuisutut akilersuutinut danskit naalagaaffiannit aalajangersarneqarsimasut naapertorlugit, kiisalu akileraarutinut akitsuutinullu piumasaqaatit, Danmarkimi akiliisitsiniutigineqarsinnaasut.
• § 14 naapertorlugu aningaasat taarsiiffiginnissutit.
• Taakkua saniatigut pisassat namminersornerusunut attuumassuteqartut, inatsisartut inatsisaat imaluunniit inatsisartut peqqusutaat naapertorlugit pinngitsaaliissummik akiliisitsiniutigineqarsinnaapput.

Kiisalu ilisimatitsissutigineqassaaq, pinngitsaaliissummik akiligassanut il. il. politiit akiliisitsiniarnermut oqartussaatitaanit piumasarineqartunut arsaarinnittoqarsinnaasoq.

Ilanngaassineq, atuutilersitsineq akiliisitsiniarnerlu pissapput akiliisitsiniarneq aningaasarsiatigut, akilersuinissamik isumaqatigiinnikkut pinngitsaaliissummilluunniit pigisanik tigoriaannarnik matussuserneqarnissaa isumaqatigiissutigineqareersimagaluarpalluunniit.

Akiitsullit, 2007-imi akileraarutitigut akiliivallaarutinik tunniussinermut atatillugu ilanngaassinermut, atuutilersitsinermut akiliisitsiniarnermulluunniit akerliusut, Akileraartarnermut Aqutsisoqarfimmi Akiliisitsiniarnermut Oqartussaasup allaffianut, uani adressiata allassimanera nanineqarsinnaasumut: www.aka.gl saaffiginnissinnaapput.

Ukiumi aningaasarsiorfiusumi 2007-imi inaarutaasumik nalunaarutip akileraarnikippallaarsimasutit takutissappagu Akileraartarnermut Aqutsisoqarfiup 2009-imut siumoortumik nalunaarsuinermut atatillugu 18.000 kr.-it tikillugit nalunaarsuutinut ilanngussinnaavai, Namminersornerullutik Oqartussat Nalunaarutaat nr. 2, 1. december 2006-imeersoq naapertorlugu. Tamanna 2007-imi inaarutaasumik nalunaarummi 2009-imilu skattikortimi takuneqarsinnaassapput. Akileraarnikippallaarutitit naatsorsuutinut ilanngunneqanngippata PBS aqqutigalugu septemberi, oktoberi novemberillu qaammataanni 2008- mi akileeqqusissutinik nassinneqassaatit.

Nuuk, august 2008:

Namminersornerullutik Oqartussat

Akileraartarnermut Aqutsisoqarfik, Akiliisitsiniartarnermut Oqartussaasut

Postboks 1015

3900 Nuuk