Akitsuutinik qaffaanissaq toqqarneqarpoq

Soorunami paasisinnaavara, suliffeqarfiit, kattuffiit, atuisut allallu inatsisartut akuersinerat pillugu nuannaarpallaarsimanngimmata.

Oqallinnerli allamut sanguallaartinnagu erseqqissaatigerusuppara, Naalakkersuisut annertungaatsiartumik sipaaruteqarnissamik imaluunnit Nunatta Karsianut isertitassat 100 million koruuninik ilaniarneqarnissaannik imaluunnit sipaaruteqarlunilu isertitaqarniarnerunissamik suliakkerneqarsimammata.

Taamaattumik Naalakkersuisut suliassarisimavaat, periarfissat taakku arlaannik toqqaanissamut atatillugu politikkikkut amerlanerussuteqalersitsinissaq.

Inatsisartuni partiit sukumiisumik oqaloqatigereerlugit kiisalu aningaasanut inatsisissap 2008-moortup suliarineqarnerani Naalakkersuisut paasivaat, sukkut, sodavandit, imigassap tupallu akitsuutaasa qaffanneqarnissaannut amerlanerussuteqalersitsinissamik periarfissaqartoq.

Taamaattorli IA-p isertitaqassuseq tunngavigalugu akileraarusersuinissamik siunnersuutaa aamma Demokraatit sipaaruteqarnissamik isertitaqarnissamillu siunnersuutaat politikkikkut amerlanerussuteqalersitsisinnaasimanngillat.

Naalakkersuisuni nalunngilarput, akitsuutinik qaffaasarnerit ajornartorsiutinik tamanik qaangiisitsisinnaanngitsut. Kisiannili akit qaffanneqarsimasut allat assigalugit Naalakkersuisut naatsorsuutigaat, sukkut, sodavandit, imigassap kiisalu tupap akiisa qaffanneqarnisigut taakkuninnga atuinerit annikilliumaartut. Atuineq annikinnerulissappat imigassaq peqqissuserlu pillugit politikkikkut anguniakkanut naapertuutissaq.

Sukkunik, sodavandinik, imigassamik tupamillu atuinikinnerulernerup suliffeqarfinnit sanaartortunit, eqqussuisartunit tuniniaasartunillu soorunami malugineqarsinnaassaaq. Tamanna ajuusaarnarpoq, akitsuutinilli qaffaanissamik aalajangernerup kingunerisa avaqqunneqarsinnaanngitsut tamanna ilagaat.

Aningaasaqarnermut Nunanullu Allanut Naalakkersuisoq

Aleqa Hammond

Annertunerusumik paasisaqarusukkuit paasiniaavigineqarsinnaavoq: +299 345000