Nunatsinni akileraarusersueriaaseq akitsuusersueriaaserlu pillugit nunanut allanut sanilliussilluni nalunaarusiaq misissuisitap Naalakkersuisunut ilaasortamut Augusta Sallingimut ullumikkut tunniuppaa. Nalunaarusiaq Kalaallit Nunaanni akileraarutitigut akitsuusiisarnikkullu pissutsit nunani qaninnerusatsinni akileraartarnikkut akitsuusiisarnikkullu pissusiusunut sanilliussineruvoq tamatumalu saniatigut nunatsinni pineqartunut pissutsit naleqqulluartuunersut nalilersorneqarput allannguutissanillu siunnersuuteqarfiulluni. Aammattaaq Naalakkersuisunut ilaasortap nalunaarusiaq Inatsisartunut ilaasortanut ullumikkut agguaappaa ilisimatitsissutigalugulu Naalakkersuisunit nalunaarusiaq Inatsisartut 2003-mi ukiakkut ataatsimiinnissaanni saqqummiunneqassasoq oqallisigineqarnissaa siunertaralugu. Oqallinnissarlu taanna tunngavigalugu inatsisinik aaqqissuussaanikkullu pissutsinik allannguinissamut pisariaqartitsilissappat Inatsisartut 2004-mi upernaakkut ukiakkullu ataatsimiinnissaannut allannguutaajumaartussat saqqummiussassanngorlugit piareersarneqassapput 2005-imilu januarip aallaqqaataani atuuttussanngorlugit. Naalakkersuisunit taamaalilluni aaqqissuusseqqinnissaq pillugu oqallinnissamut piffissaq pisariaqartinneqartoq aqqutissiuunneqassaaq akileraarutitigut akitsuusiisarnikkullu aaqqissuusseqqittoqarnissaa siunniunneqassappat sapinngisamik politikkikkut amerlanerpaanik isumaqatigiiffiulluni ingerlanneqarsinnaaqqullugu. Misissuisitap uku inuttarai: Siulittaasoraat Kubenhavnimiittumi Handelshujskolemi Institut for Nationalukonomiimi professori Suren Bo Nielsen, Kammeradvokaten Hans Christian Vinten Kubenhavnimi advokatinit Poul Schmidtikkunnik piginneqataasoq, Namminersulernissamut Ataatsimiititaliami siulittaasoq cand.scient.pol. Jakob Janussen aamma Told- og Skattestyrelsemi allaffimmi pisortaq Lic.scient.adm. Carsten Vesteru Jensen.
Nalunaarusiaq uani pissarsiarineqarsinnaavoq: Akileraartarnermi Pisortaqarfik, Postboks 1605, 3900 Nuuk, email: tax@gh.gl, uani aaneqarsinnaavoq: akileraarusersueriaaseq akitsuusersueriaaserlu pillugit nalunaarusiaq. Nalunaarusiaq PDF-filiuvoq.
Nuuk, martsip 27-at 2003