Nunatsinni siunissami akileraarutit akitsuutillu pillugit tusarniaanermut maanga tikilluaritsi immikkuttaaq tikilluaqqorusuppakka nalunaarusiortut ullumikkut saqqummiussillutillu apeqqarissaarfigineqarsinnaasut.
Inuiaqatigiit aaqqissugaanerat pillugu iliuusissatut pilersaarutissatut Naalakkersuisut siunnersuutaanni 2000-imi ukiakkut saqqummiunneqartumi ilaavoq Naalakkersuisut taamani qinigaaffiup ingerlanerani Kalaallit Nunaanni akileraarutit akitsuutillu pillugit nunanut allanut sanilliussilluni nalunaarusiortitsiniarlutik taamaalilluni nunatta nunanut allanut sanilliullugu unammillersinnaassuseqarnera nalilersorumallugu.
Tamannalu 2002-mi ukiakkut ataatsimiititaliap pilersinneqarneratigut pivoq. Ataatsimiititaliap sammisaminut ilisimaarinnilluartup siulittaasoraa siusinnerusukkut vismandiusimasoq professor Søren Bo Nielsen, ilaasortallu ilaat makkuupput; kammeradvokatip akileraarutitigut akitsuuserinikkullu immikkoortortaani pisortaq advokat Hans Christian Vinten, allaffimmi pisortaq Carsten Vesterø Jensen aammalu namminersorneq pillugu isumalioqatigiissitat siulittaasuat Jakob Janussen.
Ataatsimiititaliap ataatsimeeqqaarnermi kingorna Naalakkersuisunut siunnersuutigaa misissugassat annertusineqassasut tassa akileraarutit akitsuutillu pillugit nunanut allanut sanilliussilluni misissuinissap saniatigut nunatsinni akileraarusersueriaatsip akitsuusersueriaatsillu ilusilersorneqarneri tassungalu allannguutaasinnaasut nalilersuiffigineqarnissaat ilanngullugit misissuiffigineqassasut. Tamannalu Naalakkersuisunit ilassilluarneqarluni ilalerneqarpoq.
Martsip 27 -ani 2003-mi ataatsimiititaliap nalunaarusiani Naalakkersuisunut tunniuppaa Naalakkersuisullu ingerlatiinnarlugu tamanut tusarniaatigineqarnissaa siunertaralugu saqqummiuppaat tamatumalu kingorna Inatsisartut 2003-mi ukiakkut ataatsimiinnissaannut politikkikkut oqallisigineqarnissaa siunniullugu - namminersorneq pillugu oqallinnissamut malitsigitiinnarlugu.
Tassalu ullumikkut nalunaarusiamik annertuumik peqalersimavugut annertuginarsinnaagaluarluni assut allalluagaasoq ilusilersorluagaasorlu imarisaalu ulluinnarni akileraaruserinermik sammisaqanngikkaanni paasiuminaassinnaagaluartut. Nammineq eqqaarusuppara immikkoortumi siullermi eqikkaaneq paasiuminartoq atuarneqarsinnaammat.
Ualeq manna ataatsimiititaliap nalunaarusiami pingaarnertut imarisai saqqummiunniarpaat taassumalu kingorna maani najuuttut apeqquteqarnissaminnut periarfissinneqassapput taamaasilluni isummanik pigiliutiinnarsimasanik aallaaveqarani siunissami akileraarusersuueriaasissaq akitsuusersueriaasissallu pillugit oqallittoqarnissaa siunertaralugu. Maani oqallinnermi isummersuutit Naalakkersuisoqatikkalu ukiaq manna Inatsisartuni ataatsimiinnerup naggataata tungaani ualeq manna sammisassagut pillugit oqallinnissatsinnut piareersarnitsinni tusarnaarluarumaarpagut.
Allannguissanerluta taamaassappallu sutigut allannguisinnaanerit politikkikkut aalajangiiffigisussaavagut taamaattuminguna uagutsinnik politikerinit ullumikkut oqariartuutigineqartut sumut samminersut maluginiassallugit pingaaruteqarluinnartoq.
Nalunngisatsitut siunissami oqimaatsunik arlalinnik suliassaqarpugut ilaallu pingaaruteqartut uani taasinnaasakka tassaapput - namminersulerniarneq, inuiaqatigiittut namminerisamik naammattumik aningaasalersorsinnaannginneq, qallunaat naalagaaffianit tapiissutisisarneq annertooq, isertitatigut nammaqatigiinnginneq, naatsumik oqaatigalugu naammassisassagut annertoqaat. Tassunga atatillugu aamma eqqaasinnaavara siunissami akileraarusersueriaasissaq akitsuusersueriaasissallu politikkikkut iliuuseqarfissatsinnut allanut, assersuutigalugu taasinnaavakka isumaginninnikkut, ineqarniarnikkut, inuussutissarsiornikkut allanullu politikkikkut aaqqinniagassatsinnut attuumassuteqarluinnarnerat eqqarsaatigalugu, akileraartarnikkut akitsuusiisarnikkullu politikkit ataatsimut isigalugit tassaammata politikkikkut suliniuteqarfiusussat aatsaat eqqaasama aningaasalersorneqarnissaannut matussutissiisussat.
Qilanaarpunga uummaarissumik kinguneqarluartussamillu ullumikkut oqallittoqarnissaanut aqutsisussarpullu aqutsinermut misilittagaqarluartoq Juaaka qinnuigissavara ualeq manna pisussanut ingerlatseqqullugu.