IMAK-imik isumaqatiginninniarnerit

Mattussinerup kingunerissavaa IMAK-imi ilaasortat 1. marts 2012-ip kingorna kommunini Namminersorlutik Oqartussanilu atorfinitsinneqarsinnaajunnaarnerat.

Kommunit Naalakkersuisullu paasivaat illuatungeriit tunngaviusumik isumaqatigiissutaat atuuttoq naapertorlugu tamanna unioqqutitsinertaqanngitsumik alloriarnerusoq. Kommunit Naalakkersuisullu paasivaat isumaqatiginninniarnerit unitsinneqanngitsut illuatungeriillu aaqqiagiinngissutaat annertuseriaraluartoq isumaqatiginninniarnerit ingerlatiinnarniarneqartut.

Kommunit Naalakkersuisullu isumaqatiginninniarnernut ingerlasunut tunngatillugu kissaatigisimavaat ilinniartitsisut sulinerminni piffissaq annertunerusoq ilinniartitsinernut atortariaqaraat. Kommunit Naalakkersuisullu qularutiginngilaat meeqqat atuarfianni atuartut ilinniartitsisut ilinniarsimasut ilinniartitsisoralugit annertunerusumik ilinniartinneqartalernerisigut atuartut nukittuneralutik ilinniaqqinnissaminnullu periarfissagissaarnerullutik meeqqat atuarfiat qimattassagaat. Kommunit Naalakkersuisullu isumaqarput ilinniartitsisut ataasiakkaat piffissaq ilinniartitsinernut atortagaat qaffanneqarpat meeqqat atuarfiani angusaasartut pitsaassusaat qaffatsinneqarsinnaassasoq.

Kommunit Naalakkersuisullu ilisimavaat ilinniartitsisut sulinerminni meeqqanik ilinniartitsinernut piffissaq annertunerusumik atortalerpassuk, ilinniartitsisut suliassanik allanik suliaqarnissaminnut piffissakinnerulissasut. Ilinniartitsisut allanik suliaqarsinnaanerat Naalakkersuisut pingaartippat, kisiannili kommunit peqatigalugit isumaqarlutik ilinniartitsineq suliassat pingaarnersarigaat. Taamatut allanngortitsinerup kingunerissavaa suliassanut allanut suliaqarnissamut piffissakinnerulerneq, tassunga ilanngullugit piareersarnissamut. Taamaattumik neriulluarfigineqarpoq meeqqat atuarfiata pitsaanerusumik ingerlalersinnaanissaa meerartatta ilinniartitaaneranut iluaqutaasumik. Naammassisaqartarnerup pitsanngortinnissaanik piumasaqarneq tamakkiisumik unammilligassaavoq inuiaqatigiit tamakkerlutik ukiuni makkunani peqataaffigisariaqagaat inuiaqatigiinnilu susassaqartut tamarmik anguniarnerani peqataaffigisariaqagaat.

Kommunit Naalakkersuisullu IMAK’ip mattussinissamik nalunaaruteqarnera ajuusaarutigaat pin-gaartumik kommunit aamma Naalakkersuisut isumaqatiginninniarmata anguniarlugu meeqqat atuarfiani atuartut atuartinneqartarnerisa pitsanngortinneqarnissaat.

Kommunit Naalakkersuisullu isumaqatiginninniarnerit ingerlatillugit pisunut kingullernut annertunerusumik oqaaseqarnianngillat.