Islandimut tikeraarneq

Aningaasaqarnermut Naalakkersuisoq, Maliina Abelsen, ulluni 26. – 30. januaari 2012-mi Islandimut tikeraarpoq. Tassani ataatsimeeqatigai islandimiut Aningaasaqarnermut ministeriat, Oddny Hardardottir aamma Aningaasanut, Aalisarnermut Nunalerinermullu ministeri, Steingrimur Sigfusson.

Oqaloqatigiinnermi pineqarput annertuumik suliffissuaqarnikkut Islandip misilittagai najukkamilu inuiaqatigiinni sunniutai, kiisalu piginnittuunermut tunngasut isumalluutinillu akileraarusersuineq pillugit Islandip ALCOA-mik isumaqatigiinniartarnermi misilittagai oqaloqatigiissutigineqarput.

Alcoap aluminiumimik aatsitsivia Islandip Kangiani Fjardarbygddip kommunianiittoq Maliina Abelsenip tikeraarpaa. Tassaavorlu Islandimiut suliffissuat, Maniitsumut eqqarsaatigineqartumut pitsaanerpaamik assersuunneqarsinnaasoq. Fjardarbyggdip kommunia arlalinnik illoqarfeeraqarpoq, inuttussutsimigut Maniitsup illoqarfiata inuisa amerlasussaannut naapertuuppoq.

Illoqarfimmi pisortat aluminiumimik aatsitsivimmut takornariartitsipput aamma Islandip Kangiani Alcoap aluminiumimik aatsitsiveqarneranit ukiuni siullerni misilittakkat, najukkami sulisussanik atuinissamut tunngatillugu inuiaqatigiinnguanilu ilaanermi unammillernartuutissimasatik oqaluttuaraat. Maliina Abelsenip aamma Fjardarbyggdimi kommunalbestyrelsi ataatsimeeqatigaa.

Maliina Abelsen oqaaseqarpoq: ”Islandimiunik suleqatinnik oqaloqatiginninnikka pissarsiffiulluarput. Islandip Alcoamik isumaqatigiinniarnerit ingerlassimasai pillugit Kalaallit Nunaannik islandimiut misilittagaannik avitseqateqarusunneq annertuvoq piumassuseqarfiulluarlunilu.

Aammattaaq Islandip Kangiani Alcoamut tikeraarneq kiisalu Fjardagbyggdimi kommunalbestyrelsimik ataatsimeeqateqarneq pissarsiffiulluarsimapput. Immikkut maluginiarsimavara Islandip Kangiani nunap ilaanut najugaqarfiusumut aluminiumimik aatsitsivik ajunngitsumik sunniuteqartoq. Nutaanik aalajangersimasumillu suliffissatigut, nunap immikkoortuani innuttaasut kinguariartornermut misigisimasaanut unitsitseqataasimavoq. Aammattaaq najugaqarfiusup eqqaani aatsitsivik inuussutissarsiutinut allanut aningaasaqarnikkut pitsaasumik pingaaruteqarluartuuvoq.

Peqatigitillugu Alcoap pisortaanit kommunalbestyrelsimilluunniit isertuunneqanngilaq, aluminiumimik aatsitsivik sulisunut immikkut piumasaqaateqarmat, tassa aatsitsivik ukiumut ullut 365-t ullormut unnuamullu nalunaaquttap akunneri 24-t nioqqutissiortarpoq. Tamatuma kinguneraa ilaatigut sulisut nal. ak. 12-ni nikittarlutik sapaatip akunneranut nal. ak. 48-t angullugit sulisarmata.

Saniatigut misilittagaqarfigineqarpoq, aatsitsiviup sulisussaqartinniarnera najukkap eqqaanit naammattumik sulisussaqartinneqannginnera. Sulisut affaasa missaat Islandimi nunap ilaanit allaneersuupput. Sanaartornerup ingerlanissaanut Kalaallit Nunaanni maannamut sulisussat nunanit allaneersut annertuumik ukkassimavagut, kisiannili aamma ingerlatsineq tikikkutsigu uagut nammineq sulisussavut annertuumik ukkattariaqassavagut. Aluminiumimik suliffissuaqarneq aningaasatigut nuannaarutigissagutsigu pisariaqarpoq sulisussat tamarmik nikerarsinnaasut suliffissaqarfiusumullu nuunnissamut piumassuseqartut. Tamatuma aamma innuttaasut ilaannut suliffissuaqarnermut isertussanut allamik ilinniaqqinnermik annertuumik ingerlatsinissaq pisariaqartissavaa.

Naatsorsuutigaara Maniitsumi aluminiumimik aatsitsivissaq pillugu oqallinneq nangikkumaartoq. Inatsisartuni annertuunik arlaqartunik aalajangiisoqartussaavoq, taamatut Alcoamik isumaqatiginninniarnerit unamminartuusussaapput. Matumani islandimiut misilittagaat iluaqutigisinnaavagut.