Akiitsut maanna iliuuseqarfigineqassapput

Perngaammik aatsaat taama sukumiitigisumik akiitsut pillugit nalunaarusiortoqarpoq, taamaattumillu Maliina Abelsenip ajornartorsiutip 2012-imi iluuseqarfiginissaa qilanaaraa:

"Nassuiaammi innuttaasut akiitsuisa qanoq inissisimanerat sukumiisumik nassuiarneqarpoq. Nassuiaat kommunit peqatigalugit akiitsut qaffakkiartunnginnissaasa qanoq isiorluta iliuuseqarnissatsinnik oqaloqatigiinnissatsinnut aallaavissatsialassuuvoq".

2010-miit 2011-mut akiitsut ullormut 131.000 kr.-inik qaffattarsimapput.

Kisitsit qaffasissoq, kisiannili akiliisitsiniartarnerup 2008-mi qitiusumut eqiterutsinnerata siorna ullormut qaffariaataasartunut 243.000 kr.-iusimasunut naleqqiullugu pitsanngoriaataasoq.

"Isumaqarpunga, ilorraap tungaanut ingerlasoqartoq. Kisianni suli siunitsinni suliassarpassuaqarpugut. Akiliisinnaasut akiliiumanngitsulli akiliisittariaqarpagut.

Akiligassaminnik innuttaaqatiminnut taamatut ingerlatitseqqiinnartartut taamatut ingerlaannarsinnaanngillat. Inatsisinik allanngortitsisoqassanersoq imaluunniit allanik iliuuseqartoqassanersoq kommunit peqatigalugit ukiortaap kinguninngua eqqartussavarput." Maliina Abelsen naggasiivoq.