Akileraarutinit utertoorutissat pisortanullu akiligassanik akiliisitsineq

2010-mi augustip naalernerani Akileraartarnermut Aqutsisoqarfiup 2009-mut akileraarutinit utertoorutissat katillugit 152 mio. koruunit missaat akiliutigissavai.

Akiliutigineqarnerannut atatillugu ilanngaassisoqassaaq, akuliuttoqarluni allanillu akiliussisoqarluni akileraartartoq pisortanut akiitsoqarsimassappat.

Ukioq manna taamaaliornikkut katillugit akiitsulinnit 9.000-it missaannit 40. mio. koruunit missaat akilersinneqarput, taamaalilluni 112 mio. koruunit missaat akiliutigineqassallutik.

Aningaasat akilersinneqartut akiliutigineqartut tamarmiusut 26,5 %-iisut amerlassuseqarput, taakku ukiumut siulianut naleqqiullugu 3 %-it missaannik qaffariarlutik.

Aningaasanit akilersinneqartunit 15 mio. koruunit missaat Namminersorlutik Oqartussat namminneq akiligassanut kinguaattoorutaannik matusissutissatut akilersinneqarput, sinnerilu 25 mio. koruunit missaat pisortaqarfinnut allanut soorlu INI-mut, Nukissiorfinnut kommuninullu sisamanut akiitsulinnit pisassanut matusissutitut akilersinneqarlutik.

Taamatut agguarsimanerisigut uppernarsarneqarportaaq Akiliisitsiniartarnermut Oqartussaasut akiliisitsiniarnerminni Namminersorlutik Oqartussat namminneq akiitsunut kinguaattoorutaat pingaarnerutinngikkaat assersuutigalugu kommunit piumasaqaataat tunulliutillugit.

Augustip naalernerani akiliuteqarnerup saniatigut upernaap ingerlanerani aasalerneranilu § 15 malillugu 39 mio. koruunit missaat akiliutigineqarsimapput, taakkulu akiliutigineqarnerinut atatillugu pisortanut akiligassanut kinguaattoorutinut matusissutissatut 9 mio. koruunit missaat akilersinneqarsimapput, taamaalillunilu ukioq manna akileraarutinit utertoorutissanik akiliuteqarnertigut pisortanut akiligassanut kinguaattoorutit katillugit 50 mio. koruunit missarluinnaannik ataatsimut isigalugu ikilisinneqarput.