Aningaasaqarnikkut immikkut ilisimasalik

Aningaasaqarnermut Nunanullu allanut tunngasutigut Naalakkersuisoqarfiup suliassaraa Naalakkersuisunut ilaasortamik kiffartuussinissaq akisussaaffigalugillu Namminersornerullutik Oqartussat aningaasaataat aningaasaqarniarnikkullu politikkia.

Sulinerput naalakkersuinikkut aalajangiisartunut qanittumi pissangartumik suliffeqartitsivoq inuttut ineriartornissamut pitsaasunik periarfissalik. Sulinermi akuttunngitsumik piumaqaatigineqartarpoq suleqatit eqaatsumik sulisinnaasut.

Aningaasaqarniarnikkut Pilersaarusiornermik immikkoortortaqarfiup suliassarai

• Aningaasaqarniarnikkut aaqqissuussinernik misissueqqissaarnerit allannguiniarnermullu peqataasarneq
• Aningaasaqarnikkut periutsinik ingerlatsinermik isumaginninneq ineriartortitsinerlu
• Aningaasatigut inatsisinik ilassutissatullu aningaasaliissutinik ataqatigiissaarineq suliarinnittarnerlu
• Missingersuutitigut misissueqqissaarnernik missingersuutinillu malinnaaviginninnernik ingerlatsisarneq
• Kommuninit ataatsimoortumik tapiissutit pillugit isumaqatiginninniartarneq

Kalaallit Nunaat annertuunik unammilligassaqarpoq:

• Pisortanit immikkoortortaqarfik kommunini Namminersornerullutillu Oqartussani aaqqissuussaanikkut iluarsaassinermik ingerlatsivoq.
• Kalaallit Nunaat namminersornermik aaqqissuussinermik ingerlatsisussaavoq, tassani annertuumik piumasaqaatigineqartoq ungasinnerusumut aningaasaqarnikkut politikkimik attanneqarsinnaasumik peqarnissaq.

Suleqatissarsiorpugut, Kalaallit Nunaanni imminut napatittumik aningaasaaqarnermik pilersaarusioqataasinnaasunik ingerlatseqataasinnaasunillu.

Aningaasaqarniarnikkut Pilersaarusiornermik immikkoortortaqarfimmi suleqatigiissitamut peqataassaatit, tassani aningaasaqarniarnikkut allanngornerit pilersaarusiorneqartarlutillu aningaasatigut inatsisini aamma ataatsimoortumik tapiissutit isumaqatigiinninniutiginerini allannguinernut piviusunngortitseqataasarnissaq. Suliassarisatit inuiaqatigiit aningaasaqarniarneratigut misissueqqissaarnernut aningaasanullu inatsisinut annertunerpaamik attuumassuteqassapput.

Inuiaqatigiit aningaasaqarniarnerinit misissueqqissaarnerit ilaatigut tassaapput annertuunngorlugit aningaasaqarnikkut periutsinik ineriartortitsineq aamma inatsisitigut periutsitsinnik ingerlatsineq ineriartortitsinerlu, pisortat aningaasartuutaannut politikkimi sinaakkutit nassuiarnissaat, akit aningaasarsiallu qaffakkkiartornerisa misissuiffigeqqissaarnerat pinngoriartornerillu nalilersortassallugit. Tamakku saniatigut annertuunngorlugit aningaasaqarniarnikkut ilisimatuumut suliassanut ilaapput aningaasatigut politikki pillugu, naalakkersuinikkut aningaasaqarniarnikkullu nalunaarut aamma aningaasanut inatsimmut tunngatillugit pingaarnersiuilluni saqqummiussanik ataqatigiissaarineq saqqummiussassanillu suliarinnittarneq.

Aningaasanut inatsisinik ilassutissanillu aningaasaliissutinik suliaqarnerup misilittagaqartilissavaatit aningaasaliissutissatut inatsisinik aamma pisortat ingerlataanni aningaasartuutitigut pisariaqartitsinikkut misissueqqissaarnerni piareersaasarnernut.

Suleqatissarsiorpugut makkuninnga immikkut ilisimasalinnik:

a) Aningaasaqarniarnikkut immikkut ilisimasalik, annertuunngorlugit aningaasaqarnikkut immikkut ilisimasalik aningaasaqarnikkut tamakkiisumik takunnissinnaasoq immikkullu ilisimasalik, aningaasaqarniarnikkut missisueqqissaarnernik ikiortigisinnaasarput aningaasaqarniarnikkullu periutsinik taakkununnga ilanngullugit uagut inatsisitigut periutsitsinnik saqqummiussassanik allagaqarsinnaasoq ineriartortitsisinnaasorlu, imaluunniit

b) Aningaasaqarniarnikkut immikkut ilisimasalik annikitsunik aningaasaqarnermut pikkorissumik, ulluinarni aningaasaliissutinik inatsisinik suliarinnissinnaasoq, taakkununnga ilanngullugit aningaasatigut inatsisinik, ilassutissatut aningaasaliissutitigut inatsisinik aamma missingersuutinik malinnaaviginninnernik ilaalu ilanngullugit.

Piginnaasassatit

Inuiaqatigiinni ilinniakkatigut ilinniagaqarsimanissaq soorlu cand.polit, cand. scient. adm imaluunniit cand. merc-itut.

Kisitsisinut misissueqqissarnermullu pikkorissuunissat, allakkatigut oqaatsitsigullu erseqqissumik eqqoqqissaartumillu saqqummiussisinnaanissat.

Naalakkersuisoqarfinnut, aqutsisoqarfinnut suliffeqarfinnullu kiisalu naalakkersuinikkut avatangiisinut ulluinnarni annertuumik attuumassuteqarpugut. Taamaattumik suleqatigiinnikkut pissutsinik pitsaasunik ataavartunillu pilersitsisinnaassuseqassaatit.

Iluaqutaassaaq, inuiaqatigiinni aningaasaqarniarnikkut misissueqqissarnernut misilittagaqarnissat aamma aningaasaqarniarnikkut politikkimut soqutiginnittuunissat.

Atorfinitsitaanikkut pissutsit

Atorfiit sulisunut isumaqatigiissutit atuuttut naapertorlugit aningaasarsiaqartinneqartarput. Aningaasarsiaqarnikkut atorfinitsitaanermilu pissutsit, atorfinikkiartorluni angalaneq aamma pequtit nuutsinneqarnerat akilerneqartassapput Kalaallit Nunaanni Naalakkersuisut aamma pineqartup kattuffiata akornanni sulisunut isumaqatigiissutit atuuttut naapertorlugit.

Inissamik atugassaqartinneqarsinnaavutit, malittarisassat atuuttut naapertorlugit akiliuteqarfigineqartartussamik. Utaqqisunut allattorsimaffeqarpat, utaqqiissaasumik inimik atugassaqartinneqassaatit.