Allaffimmi pisortaq

Aaqqissuussaanikkut inissisimaneq

Allaffimmi pisortaq pisortaqarfiup aningaasaqarnermut allaffiani ingerlatsinermut immikkut immikkoortortami aqutsisuuvoq. Allaffimmi pisortap saniatigut Aningaasaqarnermut allaffimmiipput naatsorsuuserinermut allaffimmi sulisut tallimat. Naatsorsuuserinermut allaffimmi akiliisitsiniarnertarnermullu allaffimmi immikkoortortami aqutsisut allaffimmi pisortamut atassuteqartartuupput. Allaffimmi pisortaq ingerlatsinermut immikkoortortami pisortamut atassuteqartartuuvoq.

Suliassat

Aningaasaqarnermut allaffiup makku pingaarnertut suliassarai:

• naatsorsuuserinermi suliassat
• pisortaqarfiup naatsorsuutai
• karseqarnermi suliassat, tassunga ilanngullugit pingaartumik Qaqortumi, Sisimiuni, Ilulissani kiisalu Københavnimi Aalborgimilu immikkoortortat
• kommuninik Namminersornerullutillu Oqartussat ataanni suliffeqarfinnik ilitsersuineq ikiuinerlu
• naatsorsuuserinermi sulianik ataqatigiissaarineq

Allaffimmi pisortap aningaasaqarnermut allaffimmi suliat ulluinnarni aqunnissaat aaqqissuunnissaallu akisussaaffigaa. Tamatuma saniatigut allaffimmi pisortap aqutsinermi saniatigut ulluinnarni sulinermi peqataassaaq.

Piginnaanerit

Naatsorsuutigaarput allaffimmi pisortaq makkuninnga piginnaaneqassasoq:

• naatsorsuuserinerup aamma/imaluunniit aningaasaqarnerup iluanni atuagarsornermik ilinniagaqarluarneq (naatsorsuuserinermi, aningaasaqarnermi assigisaanniluunniit HD)
• naatsorsuuserinermik naatsorsuinermillu misilittagaqarneq
• akiligassaqarfinnik akiligassalinnillu aqutsinermik misilittagaqarneq
• suleqateqarsinnaassuseqarluarneq
• oqaluttariarsorluni allattariarsorlunilu attaveqarsinnaassuseqarluarneq
• torersuuneq eqqortuunerlu
• namminersorsinnaaneq
• sungiussisinnaassuseqarneq
• sullissillaqqinneq

Akissarsiat atorfeqartitaanermilu atugassarititaasut

Atorfik tjenestemanditut atorfiuvoq, maanna Kalaallit Nunaanni akissaateqarfiit 36-anni inissisimasoq, pensionisiaqaataasussanik immikkut tapisiaqartinneqartoq 55.720,00 kr.-inik, taassumalu qaavatigut immikkut tapisiaqartinneqartoq 45.280,00 kr.-inik (tapit tamarmik 1. april 1991-imi akit malillugit ukiumut tunngaviusumik aningaasarsiat naapertorlugit). Aammattaaq atorfik isumaqatigiissuteqarnikkut atugassarititaasut malillugit inuttalerneqarsinnaassaaq.

Atorfinitsitsineq pissaaq Kalaallit Nunaanni Namminersornerullutik Oqartus­sani kommuninilu tjenestemandit pillugit Inatsisartut inatsisaat nr. 21, 18. december 2003-meersoq naapertorlugu. Isumaqatigiissutitigut atugassarititaasut malillugit atorfinitsitsineq Kalaallit Nunaanni Naalakkersuisut pineqartullu kattuffiata akornanni isumaqatigiissut naapertorlugu pissaaq.

Atorfimmut atatillugu inissaqartitsisoqarsinnaavoq malittarisassat/isumaqatigiissutit sukkulluunniit atuuttut malillugit ineqarnermut, qularnaveeqqummut il.il. akilersorneqartussamik.

Akissarsiat atorfeqarnermilu pissutsit, tassunga ilanngullugit atorfinikkiartorluni atorfeqarunnaarnermilu angalanermut akiliunneqarsinnaatitaaneq pisattallu nuunneqarnerat Kalaallit Nunaanni Naalakkersuisut pineqartullu kattuffiata isumaqatiginninniarsinnaatitaasup akornanni isumaqatigiissut/tit atorfininnermi atuuttoq/ttut naapertorlugu/git pissapput.

Qinnuteqaat kingusinnerpaamik 18. september 2008 Akileraartarnermut Aqutsisoqarfimmit tiguneqareersimassaaq.