Angajoqqaarsianut angajoqqaarsiaqartitsisarnermullu tunngasuni suliaqarfimmi sulisunut quppersagaaraq nutaaq

Quppersagaaraq angajoqqaarsianut atuagassiaavoq, Norsk Forsterhjemsforeningimiillu nutsigaalluni. Quppersagaaraq pitsaasuuvoq paasiuminartuullunilu aamma tarnip pissusiinik ilisimasalimmit suliarineqarsimalluni.

Quppersagaaraq angajoqqaarsiaqartitsisarnermut tunngasuni suliaqarfimmi sullissisunit aamma suliaqarfinni allani meeqqanik inuusuttunillu sumiginnagaasimasunik sullissisunit atorneqarsinnaavoq. Attaveqartarneq, tamatumalu isumaa pingaarutaalu, kiisalu ajortumik ingerlasoqartillugu meeqqat qanoq ineriartortarnersut aamma angajoqqaarsiat meeraq pillugu qanoq iliuuseqarsinnaanerat quppersagaaqqami naatsumik piviusorsiortumillu allaaserineqarput. Attaveqartannginnermi imaluunniit ajoqusertoqarsimatillugu ajornartorsiutaasartut quppersagaaqqami paasissutissiissutigineqarput.

Angajoqqaarsiat meerarsiallu atugarisaat pitsaanerulersinniarlugit naalakkersuisoqarfiup suliaqarneranut atatillugu quppersagaaraq saqqummersinneqarpoq. Kommuninut angajoqqaarsiaqartitsisarnermik suliaqartunut quppersagaaraq nassiunneqassaaq.

Quppersagaaraq naalakkersuisoqarfiup nittartagaanut inissinneqassaaq akeqanngitsumillu anisinneqarsinnaalluni.

Attaveqartarneq pillugu paasisaqarnerorusukkaanni Kim S. Golding, Dansk psykologisk forlagimeersup atuakkiaa Styrk barnets tilknytning (meeqqap attaveqartarnera annertusaruk) innersuussutigineqarpoq.