Allatsimik tusagassiisartumillu

Pissanganartumi suliffimmilu allanngorarfiusorujussuarmi naalakkersuinermik, sulianullu aaqqissuussanik inummik piumassuseqartumik kajumissuseqartumillu 1. oktober 2009-mi  atorfinittussamik pissarsiorpugut imaluunniit piffissaq isumaqatigiissutaasinnaasoq aallaavigalugu.

Isumaginninnermut Naalakkersuisoqarfik sulianik pissanganartorpassuarnik ukiuni aggersuni piviusunngortinneqartussanik aallartitsinikuuvoq. Aammattaaq Naalakkersuisoqarfik innuttaasunit naalakkersuinermillu sulialinnit annertuumik eqqumaffigineqarpoq.

Naalakkersuisunut ilaasortamut allatsip tusagassiisartullu akisussaaffii suliassaalu
Naalakkersuisunut ilaasortap allattaata tusagassiisartullu Aqutsinermut allattoqarfimmi inissisimavoq, Naalakkersuisunut ilaasortaq Naalakkersuisoqarfillu sullitassaralugit. Suliassaalerumaartut tassaapput:

• Naalakkersuisunut ilaasortamut, isummernissamut tunngavissianik, allakkianik, tusagassiuutitigut nalunaarutinik il.il. missingiusiorneq
• Naalakkersuisunut ilaasortap tusagassiorfinnut attaveqarniarnerani ikiortarnissaq
• Oqaasiinnakkut allakkatigullu saaffiginnissutinut Naalakkersuisunut ilaasortap akissuteqartarnerani ikiortarnissaa
• Naalakkersuisunut ilaasortap suliassaanik isumaginninneq
• Naalakkersuisunut ilaasortap ataatsimiinnissaasa Aqutsinermilu Allattoqarfimmi sulisut allat  suleqatigalugit angalanissaanut pilersaarusiorneq

Naalakkersuisunut ilaasortamut allatsip tusagassiisartullu Naalakkersuisunut ilaasortap angalanerini ingiaqatigisassavaa, taamaattumillu angalangaatsiartarnissaq naatsorsuutigineqartariaqarpoq.

Piginnaasat:
Atorfik inuppassuarnut siamasissumik attaveqarnermik ilaqarpoq. Taamaattumik Naalakkersuisumut ilaasortamut allatsip tusagassiisartullu ataqatigiissaarinermut ineriartortinneqarluarsimasunik piginnaaneqarnissaa, avammut sammisuunissaa kiisalu allattariarsornikkut oqaluttariarsornikkullu attaveqallaqqissuunissaa pingaaruteqarpoq.

Piukkunnaateqarluni qinnuteqartoq ilinniagartuujusariaqarpoq aamma/imaluunniit kattuffinni soqutigisaqaqatigiiffinni assingusuniluunniit patajaatsumik misilittagaqarsimassaaq.

Isumaginninnermut Naalakkersuisoqarfimmi Naalakkersuisunut ilaasortamut allatsip tusagassiisartullu suliassat assigiinngiiaartorpassuit naammassisassavai. Taamaattumik atorfinittussaq suliassatigut, aaqqissuussaanikkut apeqqutinillu naalakkersuinermut tunngasunut tamakkiisumik paasinnissinnaassuseqarnissaa kissaatigineqarpoq.

Naalakkersuisunut ilaasortamut allatsi tusagassiisartullu inuiaqatigiinni kalaallini pissutsinik ilisimasaqarluarnissaa atorfinittussarlu marluinnik kalaallisut/danskisut allattariarsornikkut oqaluttariarsornikkullu piginnaasaqarnissaa  pingaaruteqarpoq. Oqaloqatigiinnermi minnerpaamik tuluttut oqalussinnaaneq naatsorsuutigineqarpoq.

Akissarsiat atorfinitsitaanermilu atugassarititaasut, atorfininnermi soraarnermilu angalasinnaatitaaneq pigisanillu nassiussisinnaatitaaneq pissapput piffissami atorfiniffiusumi Kalaallit Nunaanni Naalakkersuisut atorfinittussallu kattuffiata isumaqatiginninniarsinnaatitaasut akornanni isumaqatigiissutit atuuttut naapertorlugit. Tamatuma nassatarisaanik akissarsiat isumaqatigiissutinut naapertuuttut saniatigut Naalakkersuisunut ilaasortamut allattaanermut tapeqartitsisoqarsinnaavoq. Qinnuteqartunut isumaqatigiissummik matussusiivigineqarsimanngitsunut atorfinitsitaaneq immikkut isumaqatigiissuteqarnikkut pissaaq.

Atorfininnermut atatillugu inissaqartitsisoqarsinnaavoq malittarisassat atuuttut malillugit akiliuteqarfigineqartartussamik. Nuummi inissaqarniarneq pissutigalugu ataavartumik initaartinneqarnissap tungaanut piffissami sivisujaami utaqqiisaagallartumik ineqartitaanissaq naatsorsuutigineqassaaq.