Meeqqanut inuusuttunullu periusissiaq

24. juni 2010 Naalakkersuisut aalajangerput ataatsimoortumik piginnaasallu akimorlugit Kalaallit Nunaanni tamarmi atortussamik meeqqanut inuusuttunullu ilorraap tungaanut ingerlatsiffiusussamik periusiliorniarlutik. 4. oktober 2011 meeqqanut inuusuttunullu periusissiaq Inatsisartuni oqaluuserineqarpoq, suleriarnerlu amerlanerusunit tapersersorneqarpoq.

Meeqqanut inuusuttunullu periusissiaq ungasinnerusoq isigalugu ataatsimut pilersaarutaavoq, qanoq ililluta tulleriiaarissanerluta meeqqanut inuusuttunullu suliniutit nutaat qanoq atuutsilersinneqartassanersut, qanoq ineriartortinneqassanersut qanorlu ataqatigiillutik suleqatigiilissanersut suliniutinut pioreersunut, soorlu tungiuinerup, atuarfeqarnerup peqqinnissaqarfiullu iluani suliniutinut.

Meeqqanut inuusuttunullu periusissiakkut allaaserineqassaaq, meeqqat inuusuttullu piginnaatitaaffii qulakkeerniarlugit sunik pitsanngorsaasoqassanersoq. Tamanna ima isumaqarpoq, periusissiakkut  inuiaqatigiinnik atugarissaartunik ineriartortitsinissamut aqqutissiuussisoqassasoq, taakkunani meeqqat inuusuttullu tamarmik toqqissisimasumik meeraaneqarlutik, aammalu meeqqat inuusuttullu tamarmik ineriartornissaminnut periarfissinneqarlutik, taamaalillutik piginnaanerminnik ineriartortitsisinnaalerlutik pitsaasumillu inersimasutut inuunermik pilersitsillutik.

Meeqqanut inuusuttunullu periusissiaq arfinilinnik pingaarnertut sammisassaqarfiuvoq, immikkut ittumik suliniuteqarnermi ukiuni tulliuttuni 10-15-ini meeqqanut inuusuttunullu tunngatillugu pingaarnertigut anguniagassanik ineriartornissamillu takutitsisumik suliaqartoqassasoq:

1. Siusissukkut ukiui apeqqutaatillugit suliniuteqarneq
2. Ajornartorsiutinik siusissukkut suliniuteqarfiginninneq
3. Atornerluisunik katsorsaaneq
4. Meeqqat ilikkariartornerat ineriartornerallu
5. Ilinniarsimallutik sulisut ilisimatusarnerat
6. Suliniutit nalilersorneqarnerat, malinnaavigineqarnerat misiliiffigineqartarnerallu

Sammisaqarfiit Akileraartarnermut Atugarissaarnermullu Ataatsimiititaliap pingaarnertut inassuteqataanut naapertuupput.

Meeqqanut inuusuttunullu periusissiaq paasiniaaffigalugu paasissutaasinnaasunik allanik, anguniakkanik, anguniakkat immikkoortualuttortaanik suliniutinillu misissuataariffigiuk pingaarnertut sammisaqarfiusut arfiniliusut iluanni. Aamma paasiniarsinnaavatit paasissutissat tunuliaqutaasut suliallu ingerlaqqinnissaanni sinaakkusiinerit.